पुणे : दारू पिण्यास पैसे न दिल्याने एकाने पत्नीवर कुऱ्हाडीने हल्ला केल्याचा धक्कादायक प्रकार सोमवारी (दि. ३१) रात्री तळजाई वसाहतीत घडला. या प्रकरणी मद्यपी पतीला पोलिसांनी अटक केली आहे. पूनम दत्ता अडागळे (वय ३२, रा. खंडाळे चौक, तळजाई वसाहत, पद्मावती) हे गंभीर जखमी झालेल्या महिलेचे नाव आहे. या प्रकरणी पती दत्ता राजाराम अडागळे (वय ३८) याला अटक करण्यात आली. आरोपी दत्ता याचा पूनमशी २०१५ मध्ये विवाह झाला. दत्ता काही कामधंदा करत नाही व त्याला दारूचे व्यसन आहे.
पूनम उदरनिर्वाहासाठी घरकाम करतात. दत्ता सोमवारी (दि. ३१) रात्री आठच्या सुमारास दारू पिऊन घरी आला. त्याने आणखी दारू पिण्यासाठी पूनमकडे पैसे मागितले. तिने पैसे देण्यास नकार दिला. त्यानंतर चिडलेल्या दत्ताने कुऱ्हाडीने पूनमवर हल्ला चढवला. या हल्ल्यात पूनम गंभीर जखमी झाली. स्थानिक नागरिकांनी तिला तातडीने रुग्णालयात दाखल केले. दत्ताला पोलिसांनी अटक केली असून, सहकारनगर पोलीस ठाण्याच्या पोलीस उपनिरीक्षक रेखा साळुंके या प्रकरणी पुढील तपास करीत आहेत.
