Pimpri Crime: पिंपरी: चिंचवड परिसरातील मोहननगर येथील रस्त्यावर कोयता घेऊन नागरिकांना धमकावणाऱ्या स्वयंघोषित भाईला पिंपरी पोलिसांनी बेड्या ठोकल्या. रविवारी २६ नोव्हेंबर रोजी रात्री पावणे नऊ वाजताच्या सुमारास ही कारवाई करण्यात आली. आशिष देविदास गोरखा (वय २६, रा. महात्मा फुलेनगर, चिंचवड) असे अटक केलेल्या आरोपीचे नाव आहे. या प्रकरणी पोलीस अंमलदार गणेश करपे यांनी पिंपरी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, आशिष गोरखा हा रविवारी रात्री कोयता घेऊन मोहननगर येथील सार्वजनिक रस्त्यावर आला होता. तिथे असणाऱ्या व्यावसायिकांना आणि पादचारी नागरिकांना त्याने दमदाटी केली. ‘जिलब्या गॅंगला जो कोणी नडणार, त्याची सुट्टी नाही’ असे म्हणत शिवीगाळ करून धमकी देत त्याने परिसरात दहशत निर्माण केली. याप्रकरणी पिंपरी पोलिसांनी आशिष गोरखा याला अटक केली. पिंपरी पोलीस आधिक तपास करीत आहेत.
