पुणे: ‘खालिद का शिवाजी’ या चित्रपटाचा ट्रेलर सोशल मीडियावर प्रदर्शित झाल्यानंतर तो ऐतिहासिकदृष्ट्या चुकीचा आणि समाजात संभ्रम निर्माण करणारा असल्याचा आरोप करत, शासनाने त्वरित या चित्रपटावर बंदी घालावी, अशी मागणी करण्यात आली आहे. यासंदर्भात लवकरच सरकारकडे विचारणा करण्यात येणार असल्याचे अखिल भारतीय पंच रामनदी निर्वाणी आखाड्याचे महंत सुधीर दास महाराज, शिवशंभू विचार मंचाचे राज्य संयोजक सुधीर थोरात आणि व्याख्याते सौरभ कर्डे यांनी पत्रकार परिषदेत सांगितले.
महंत सुधीर दास महाराज म्हणाले की, “या चित्रपटाच्या ट्रेलरमध्ये दाखवण्यात आले आहे की छत्रपती शिवाजी महाराजांच्या सैन्यात ३५ टक्के मुस्लीम सैनिक होते, त्यांचे ३५ पैकी ११ अंगरक्षक मुस्लीम होते, तसेच महाराजांनी रायगड किल्ल्यावर मशिद बांधली होती. हे सर्व दावे इतिहासविरोधी, खोटे आणि दिशाभूल करणारे आहेत.” त्यांनी सांगितले की, हे केवळ इतिहासाचे विकृतीकरण नसून, रायगडसारख्या जागतिक वारसा स्थळाच्या प्रतिष्ठेवरही आघात आहे. “चित्रपट व सोशल मीडियाद्वारे हा संभ्रम पसरवण्याचा पूर्वनियोजित प्रकार आहे, त्यामुळे याची सखोल चौकशी व्हावी,” अशी त्यांची मागणी होती.
सुधीर थोरात म्हणाले, “चित्रपटात दाखवलेल्या दृश्यांना पुष्टी देणारे कोणतेही ऐतिहासिक पुरावे उपलब्ध नाहीत. ट्रेलरमध्येच इतक्या गंभीर चुका असताना, पूर्ण चित्रपट समाजाची वैचारिक दिशाभूल करणारा ठरेल आणि नवीन पिढीमध्ये इतिहासाबाबत गैरसमज निर्माण करेल.” “शिवरायांच्या हिंदवी स्वराज्यासाठी ज्यांनी खरे योगदान दिले, बलिदान दिले त्या मावळ्यांचे श्रेय दुसऱ्यांवर ढकलण्याचा हा एक धोकादायक प्रयत्न आहे,” असा थोरात यांनी आरोप केला.
महंत सुधीर दास महाराज आणि विचारवंतांनी स्पष्ट केले की, “शासनाच्या सांस्कृतिक विभागाकडून या चित्रपटाला पुरस्कारासाठी शिफारस करण्यात आली असल्यास, त्याबाबतही सरकारकडे विचारणा केली जाईल.” तसेच, यासंदर्भात न्यायालयात याचिका दाखल करण्याचाही निर्णय घेण्यात आला आहे.
