लोणी काळभोर, ता. 25 : सासूबाई या गावच्या माजी उपसरपंच व सध्या विद्यमान सदस्य असल्याने त्यांना गावचे राजकारण पाहावे लागते. सासरे स्वीट होम चालवितात तर पती उद्योजक आहेत. अशा स्थितीत कुटुंबाची सर्व जबाबदारी यशस्वी पार पाडून लोणी काळभोरच्या (ता. हवेली) सुनबाई श्रद्धा अजिंक्य काळभोर या सनदी सचिव पदाची परीक्षा पहिल्या प्रयत्नात पास झाल्या आहेत.
भारतीय कंपनी सचिव संस्था (आईसीएसआई) यांच्यावतीने सनदी सचिव पदाची परीक्षा डिसेंबर 2024 मध्ये झाली होती. या परीक्षेचा निकाल मंगळवारी (ता.25) दुपारी दोन वाजण्याच्या सुमारास जाहीर झाला. या परीक्षेत 400 पैकी मधून 251 गुण मिळवून श्रद्धा काळभोर हिने घवघवीत यश संपादन केले आहे. त्यामुळे लोणी काळभोरच्या शिरपेचात मानाचा तुरा रोवला आहे.
सौ. श्रद्धा यांचा जन्म मुंबईचा, त्यांचे वडील गजानन सुर्वे व्यावसायिक आहेत, तर आई गृहिणी आहेत. लहानपणापासूनच त्यांना अभ्यासाची आवड होती. आपणही सनदी सचिव व्हावे. अशी इच्छा असल्याने त्यांनी वाणिज्य शाखेतून पदवी प्राप्त केली. त्यानंतर सनदी सचिव परीक्षेचा अभ्यास 2021 साली प्रारंभ केला.
दरम्यान लोणी काळभोर येथील उद्योजक अजिंक्य काळभोर यांच्याशी मार्च 2024 साली श्रद्धा यांचा विवाह झाला. त्यांनी कुटुंबाची जबाबदारी यशस्वी पार पाडली. गरोदर असतानाही त्यांनी अभ्यासामध्ये सातत्य ठेवले. त्यांच्या कुटुंबातील सदस्यांनी त्यांना अनमोल साथ दिली, अभ्यासासाठी मानसिक पाठबळ दिले. या संधीचा फायदा घेत त्या सनदी सचिव पदाची परीक्षा उत्तीर्ण झाल्या आहेत.
दरम्यान, नुकतेच अजिंक्य काळभोर व श्रद्धा यांना कन्यारत्न प्राप्त झाले आहे. त्यातच आज सनदी सचिव परीक्षा उत्तीर्णचा निकाल लागल्याने काळभोर कुटुंबियांचा आनंद आज द्विगुणीत झाला आहे.
“लग्न झाल्यानंतर सासरच्या मंडळींनी अभ्यासासाठी वेळोवेळी प्रोत्साहन दिले. उच्च शिक्षणाचा कोठेतरी फायदा होईल. ते वाया जाणार नाही याची घरातील सर्वांनी काळजी घेतली. या यशामध्ये पती, सासरे व सासू यांचाही तेवढाच वाटा आहे. त्यामुळे मी सर्वांची ऋणी आहे”.
– सौ. श्रद्धा काळभोर (सनदी सचिव परीक्षा उत्तीर्ण)
