loni kalbhor : फुरसुंगी पोलीस ठाण्याच्या पथकाने रात्रगस्ती दरम्यान संशयास्पद हालचाली करणाऱ्या तीन अल्पवयीन मुलांना धारदार कोयता व स्प्लेंडर दुचाकीसह ताब्यातघेतले आहे . ही कारवाई उरुळी देवाची (ता. हवेली) येथील ढोलेवस्ती रोड परिसरात असलेल्या पाण्याच्या टाकीजवळ शुक्रवारी (ता.27 मार्च) पहाटे सुमारे पावणे एक वाजण्याच्या सुमारास केली आहे. या कारवाईमुळे परिसरात संभाव्य गंभीर गुन्हा घडण्यापूर्वीच पोलिसांनी तो उधळून लावल्याने स्थानिक नागरिकांकडून पोलिसांच्या सतर्कतेचे कौतुक व्यक्त करण्यात येत आहे.
पोलिसांनी दिलेल्या माहितीनुसार, 26 मार्चच्या रात्री फुरसुंगी पोलीस ठाण्याचे पथक गुन्हे प्रतिबंधात्मक गस्तीसाठी बाहेर पडले होते. उरुळी गावात गस्त घालत असताना, पोलीस हवालदार नितीन गायकवाड यांना तीन युवक संशयास्पदरीत्या दुचाकीसह उभे असल्याची व त्यांच्या जवळ धारदार शस्त्र असल्याची माहिती एका खबऱ्या मार्फत मिळाली. त्यानुसार पोलिसांनी तात्काळ वरिष्ठांना माहिती देत सापळा रचला.
पोलीस उपनिरीक्षक विष्णू देशमुख यांच्या मार्गदर्शनाखाली पंचांना सोबत घेऊन पथकाने घटनास्थळी धाड टाकली. पोलिसांची चाहूल लागताच तिघांनी पळ काढण्याचा प्रयत्न केला; मात्र पोलिसांनी तत्परतेने पाठलाग करून त्यांना जागीच पकडले. ताब्यात घेतलेल्या मुलांची अंगझडती घेतली असता एकाच्या कमरेला लपवून ठेवलेला सुमारे 15 इंच लांबीचा धारदार लोखंडी कोयता आढळून आला. तसेच त्यांच्या ताब्यातील काळ्या रंगाची स्प्लेंडर मोटारसायकल (क्रमांक MH12 YW 5164) जप्त करण्यात आली. जप्त करण्यात आलेल्या मुद्देमालाची एकूण किंमत अंदाजे 70 हजार 300 रुपये आहे.
दरम्यान, पुणे पोलीस आयुक्तालयाच्या हद्दीत 17 मार्च ते 30 मार्च या कालावधीत कोणतेही धारदार शस्त्र बाळगण्यास मनाई आदेश लागू असताना या तिघांनी त्या आदेशाचा भंग केल्याचे समोर आले. त्यामुळे त्यांच्या विरोधात भारतीय न्याय संहिता, भारतीय हत्यार कायदा तसेच महाराष्ट्र पोलीस कायद्याच्या संबंधित कलमान्वये फुरसुंगी पोलीस ठाण्यात गुन्हा दाखल करण्यात आला आहे.
