लोणी काळभोर : सार्वजनिक रस्त्यावर खुलेआम सुरु असलेल्या मटका जुगाराच्या अड्ड्यावर लोणी काळभोर पोलिसांनी छापा टाकला आहे. या छाप्यात पोलिसांनी दोघांना अटक करून 36 हजारांचा मुद्देमाल जप्त केला आहे. पोलिसांनी ही कारवाई लोणी काळभोर स्मशानभूमीच्या विरुद्ध दिशेला सार्वजनिक रोडवर ब्लॅकेटच्या दुकानाच्या बाजुला शनिवारी (ता.8) सायंकाळी सव्वासहा वाजण्याच्या सुमारास केली आहे.
कार्तिक महादेव माने (वय 19, रा. शिवकृपा सोसायटी, रुम नं.01 संभाजीनगर, कदमवाकवस्ती, ता. हवेली, जि. पुणे), अनिकेत नितीन जाधव (वय 19, शिवशक्ती मार्वलच्या पाठीमागे, लोणी काळभोर, ता. हवेली, जि.पुणे) अशी गुन्हा दाखल करण्यात आलेल्या आरोपींची नावे आहेत. याप्रकरणी महिला पोलीस अंमलदार कविता संपत साळवे यांनी लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, कार्तिक माने व अनिकेत जाधव हे जुगाराचे साहीत्य बाळगुन, स्वःताचे आर्थिक फायद्यासाठी जुगार चालवत आहेत. अशी माहिती पोलिसांना मिळाली होती. मिळालेल्या माहितीच्या अनुषंगाने पोलिसांनी सदर सापळा रचून छापा टाकला. तेव्हा वरील दोघेजण कल्याण नावाचा मटका खेळ घेत असताना आढळून आले. पोलिसांनी या छाप्यात आरोपींकडून 15 हजार रुपयांची रोकड, 20 हजार रुपये किंमतीचा ओपो कंपनीचा दोन मोबाईल व 1 हजार रुपये किंमतीचे 4 विविध कंपनीचे बंद अवस्थेतील डमी मोबाईल हँडसेट असा 36 हजार 100 रुपयांचा मुद्देमाल जप्त केला आहे.
दोन्ही आरोपींच्या विरोधात लोणी काळभोर पोलीस ठाण्यात महाराष्ट्र (मुंबई) जुगार अॅक्ट कलम 12 (अ) प्रमाणे गुन्हा दाखल करून अटक करण्यात आली आहे. ही कामगिरी लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पोलीस उपनिरीक्षक अनिल जाधव, महिला पोलीस अंमलदार कविता साळवे व त्यांच्या सहकाऱ्यांनी केली आहे. पुढील तपास पोलीस हवालदार निलेश कोल्हे करत आहेत.
