पिंपरी: चिखली-कुदळवाडी परिसरात बिबट्या आल्याने सर्वत्र एकच खळबळ उडाली आहे. गुरुवारी पहाटे साडेपाचच्या सुमारास देहू- आळंदी रोडवरील चिखली जवळ बिबट्या काही नागरिकांना दिसला. तसेच सीसीटीव्हीमध्ये तो कैद झाला आहे. यामुळे चिखली कुदळवाडी परिसरात भीतीचे वातावरण पसरले होते.
पिंपरी- चिंचवड शहरातील चिखली आणि कुदळवाडी परिसरात बिबट्या दिसल्याने परिसरातील नागरिकांमध्ये मोठी भीती पसरली आहे. पहाटेच्या सुमारास बिबट्या दिसल्याने नागरिक भीतीच्या सावटाखाली आहेत. दरम्यान, बिबट्याला पकडण्यासाठी चिखली पोलीस, वनविभाग घटनास्थळी दाखल होऊन सहा तासांच्या अथक प्रयत्नांनंतर बिबट्याला जेरबंद करण्यात यश आले आहे. गुरुवारी सकाळी बिबट्या काही व्यक्तींना दिसला, त्यांनी लगेच पोलिसांशी संपर्क साधला तसेच व्हाॅट्सअॅपवर सर्व नागरिकांना याबाबत सतर्क केले. बिबट्याचा एक सीसीटीव्ही व्हिडिओ देखील सोशल मीडियावर व्हायरल होत आहे.
