पुणे: मनसे अध्यक्ष राज ठाकरे पुण्यातील बैठकस्थळी येण्याआधी रविवार पेठेतील प्रल्हाद गवळी या पदाधिकाऱ्याच्या गणेशमूर्ती विनामूल्य देण्याच्या स्टॉलवर गेले होते. मात्र तिथे त्यांना वाहतूक कोंडीत अडकावे लागले. तिथून सुटका झाल्यावर ते गंज पेठेतील महात्मा फुले वाडा येथे अभिवादन करण्यासाठी गेले, परंतु तिथेही त्यांना वाहतुकीच्या समस्येला सामोरे जावे लागले. त्यानंतर सावित्रीबाई फुले स्मारकात होणाऱ्या बैठकीसाठी ते येत असताना त्यांच्या वाहनाला मार्गात एक-दोन ठिकाणी अडखळावे लागले.
या संपूर्ण अनुभवाचा उद्वेग राज ठाकरे यांनी बैठकीदरम्यान स्पष्ट शब्दांत व्यक्त केला. “असे मध्यवर्ती भागातील स्थळ बैठकीसाठी निवडले कोणी?” असा थेट सवाल त्यांनी केला. पुढे बोलताना ते म्हणाले, “वाहतूक कोंडी ही आता सर्वच शहरांमधील समस्या झाली आहे. नेते आपापले दौरे करून त्यात आणखी भर टाकतात. याच कारणामुळे मी मुंबईत गणेशोत्सवात कधीही कोणत्याही गणपती दर्शनासाठी जात नाही. कारण आशीर्वाद घ्यायचे आणि नंतर लोकांच्या शिव्या खायच्या, याला काहीच अर्थ नाही.”
बैठकीनंतर राज ठाकरे यांच्याशी संवाद साधताना एका स्थानिक पदाधिकाऱ्याने या सभागृहाच्या निवडीबाबत स्पष्टीकरण दिले. त्याने सांगितले की, इतर एक-दोन ठिकाणचे महापालिकेचे सभागृह उपलब्ध नव्हते. हे ठिकाण मध्यवर्ती भागात असल्याने येथे बैठक घेण्यात आली. तसेच, “बैठक व तुमची उपस्थिती यामुळे वातावरण निर्मिती होते, म्हणून हे सभागृह निवडले,” असे म्हणत समर्थन करण्याचा प्रयत्न केला. याचबरोबर पुढील वेळी वाहतूक कोंडी टाळण्यासाठी विशेष काळजी घेऊ, असे आश्वासन देण्यासही हा पदाधिकारी विसरला नाही.
