बापू मुळीक

पुरंदर : खानवडी(ता.पुरंदर) येथे आवादा सौर कंपनीच्या कर्मचाऱ्यांनी गायरान जमिनीवर आग लावल्यानंतर ती स्थानिक शेतकऱ्यांच्या जमिनींवरही पसरली. या आगीमध्ये खानवडी येथील शेतकऱ्यांच्या शेतीतील फळ झाडांसह पाईप व ठिबक सिंनाचे प्रचंड नुकसान झाले आहे. यामध्ये शेतकरी सुनील शंकर धिवार व इतर शेतकऱ्यांचे नुकसान झाले आहे.
याबाबत अधिक माहिती अशी की, खानवडी येथे गायरान जमिनीवर आवादा कंपनीचे सौर ऊर्जा प्रकल्पाचे काम चालू आहे. प्रकल्पाला ग्रामस्थांचा विरोध असताना देखील कोणत्याही विरोधाला न जुमानता हे काम मनमानी पद्धतीने चालू आहे. याबाबत खासदार सुप्रिया सुळे यांच्याकडे ग्रामस्थांनी या कामाविषयी नाराजी व्यक्त करून न्याय मिळवून देण्याची मागणी केलेली आहे. हे काम कंपनीच्या वतीने चालू असताना कंपनीच्या कर्मचाऱ्यांकडून तेथे गायरान जमिनीवर आग लावण्यात आली. ही आग आजूबाजूला असणाऱ्या शेतकऱ्यांच्या शेतापर्यंत जाऊन पोहोचली. तरीसुद्धा कर्मचाऱ्यांनी ते वीजवण्याचा कोणताही प्रयत्न केलेला नाही.

खानवडी गावातील ग्रामस्थ व पत्रकार संतोष डुबल यांनी सदरची माहिती कर्मचाऱ्यांना दिली. त्यानंतर त्यांनी आग विजवण्याचा प्रयत्न केला. परंतु तोपर्यंत गट नंबर 507 मधील सुनील शंकर धिवार या शेतकऱ्याचे प्रचंड नुकसान झाले होते. या नुकसानीमध्ये सीताफळाची सहा वर्षाची झाडे जळून खाक झाली आहेत. ठिबक सिंचनचे पाईप जळून खाक झाले. पीव्हीसी चे बारा पाईप जळून खाक झाले आहेत.
सदर नुकसानीची भरपाई मिळावी अशी मागणी सुनील धिवार यांनी तहसीलदार पुरंदर विक्रम राजपूत यांच्याकडे केली आहे. घटनास्थळचा पंचनामा करण्यासाठी तहसीलदार यांनी तलाठी यांना सूचना केल्या आहेत. काम करत असताना आजूबाजूच्या शेतकऱ्यांच्या शेत जमिनींचे प्रचंड नुकसान पोहोचत आहे. तरी त्यांना योग्य ती समज द्यावी अशी मागणी शेतकरी करत आहे.







