Lakshmi Pujan 2023 : पुणे : हिंदू संस्कृतीत दिवाळीला अनन्यसाधारण महत्त्व आहे. लक्ष्मीपूजन ही भारतीय संस्कृतीतील महत्वाची पूजा मानली जाते. प्रथेप्रमाणे दरवर्षी आश्विन महिन्यातील अमावास्येला संध्याकाळी ही पूजा केली जाते. यावर्षी लक्ष्मीपूजन 12 नोव्हेंबर म्हणजेच आज केलं जाणार आहे. दिवाळीमध्ये लक्ष्मी पूजनाला अधिक महत्त्व दिले जाते. हा दिवस व्यापारी वर्गासाठी फार महत्त्वाचा असतो. याच संदर्भात अधिक माहिती पंचांगकर्ते मोहन दाते यांनी दिली आहे.
लक्ष्मीपूजनाचा मुहूर्त
रविवारी 12 नोव्हेंबरला संध्याकाळी 5 वाजून 31 मिनिटांनी ते रात्री 8 वाजून 36 मिनिटांपर्यंत लक्ष्मीपूजनाचा शुभ मुहूर्त आहे. या कालावधीमध्ये तुम्ही देवी लक्ष्मीची विधीवत पूजा करू शकता.
लक्ष्मीपूजनाची विधी
लक्ष्मीपूजन हे 12 नोव्हेंबरला नरक चतुर्दशीच्या दिवशीच संध्याकाळी करायचे असते. लक्ष्मीपूजनच्या दिवशी व्यापारी हे चोपडी पूजन करुन आपल्या व्यवसायाच्या नव्या वर्षाची सुरुवात करतात. त्यासाठी ते नव्या वहीची विधीवत पूजा करतात. यावेळी घरोघरी लक्ष्मीचं देखील पूजन केलं जातं. घरातील पैसे, सोने-नाणे हे देवीच्या फोटोसमोर मांडून त्याची पूजा केली जाते. या लक्ष्मीने आपल्या घरी स्थिर राहावं, आपल्याला सुख द्यावं, ऐश्वर्य द्यावं यासाठी अमावस्येच्या दिवशी लक्ष्मीचं पूजन केले जाते. या दिवशी अंगाला उटणे लावून आंघोळ करतात. या दिवशी लक्ष्मीची यथासांग पूजा करून, घरासमोर सुशोभित रांगोळी काढून, दारी झेंडूच्या माळा लावून, फराळाचा, लाह्या, बत्तास्यांचा नैवेद्य दाखवून अश्विन महिन्यातील अमावास्येला लक्ष्मीपूजन केले जाते.
