पुणे : जिल्हा परिषदेच्या शिक्षकांच्या बदल्यांची सातत्याने चर्चा होत असते. सोयीच्या ठिकाणी बदलीसाठी शिक्षकांचा आटापिटा सुरू असतो. मात्र, आता ऑनलाईन प्रणालीमुळे बदल्यांसाठी शिफारस कामात येत नाही. यंदा राज्यातील सर्व जिल्हा परिषदांमधून सुमारे १५ हजार शिक्षकांनी आंतरजिल्हा बदलीसाठी अर्ज केले होते. त्यानंतर राज्याच्या ग्रामविकास विभागाने शनिवारी (ता. ३०) राज्यातील जिल्हा परिषद शाळांमधील सुमारे ४ हजार शिक्षकांच्या आंतरजिल्हा बदल्या केल्या आहेत. या सर्वांना स्वजिल्ह्यात नियुक्त्या देण्यात आल्या आहेत. यामुळे गेल्या अनेक वर्षांपासून परजिल्ह्यात नोकरी करणाऱ्या शिक्षकांना मोठा दिलासा मिळाला आहे. बदलीचे हे आदेश ऑनलाईन पद्धतीने पाठविण्यात आले आहेत.
दरम्यान, बदली आदेश मिळालेला असला तरी या शिक्षकांना चालू शैक्षणिक वर्ष संपेपर्यंत सध्या कार्यरत असलेल्या शाळांवरच काम करावे लागणार आहे. सध्या कार्यरत असलेल्या शाळांवरच शिक्षकांना हे शैक्षणिक वर्ष काम करावे लागणार आहे. नवीन शैक्षणिक वर्षात नवीन ठिकाणी शिक्षकांना रुजू होता येणार आहे. राज्यातील १५ हजार शिक्षकांनी बदल्यांसाठी अर्ज केले होते. त्यापैकी ४ हजार जणांच्या बदल्या झाल्या आहेत. यामुळे आता ११ हजार शिक्षकांना आणखी काही काळ प्रतिक्षा करावी लागणार आहे.
या बदल्यांसाठी प्रहार शिक्षक संघटनेतर्फे सातत्याने प्रयत्न केले जात होते. त्यांच्या या प्रयत्नांना अखेर आज यश आले आहे. या टप्प्यात ज्या शिक्षकांच्या बदल्या झालेल्या नाहीत, अशा सर्व पात्र शिक्षकांची संभाव्य बदल्यांसाठीची प्रतीक्षा यादी कायम ठेवली जाणार आहे. यामुळे जसजशा जागा रिक्त होतील, तसतसे प्रतिक्षा यादीतील क्रमानुसार बदली आदेश दिले जाणार आहेत. मात्र, सध्या तरी आंतरजिल्हा बदलीसाठी इच्छुक असलेल्या शिक्षकांना नवीन अर्ज करण्यास संधी मिळणार नसल्याचे प्रहार शिक्षक संघटनेचे राज्य अध्यक्ष महेश ठाकरे यांनी सांगितले.
शिक्षकांना बदलीसाठी अर्ज करण्यासाठी ६ डिसेंबरपर्यंत मुदत दिली होती. ऑनलाइन पद्धतीने सर्व अर्ज घेण्यात आले. ३० जून २०२३ ला बदलीस पात्र असतील, त्या शिक्षकांनाच अर्ज करण्याची संधी दिली होती. तसेच बदलीपात्र असलेल्या शिक्षकांसाठी बिंदुनामावली प्रसिद्ध करण्याची आणि अवलोकन करण्याची कार्यवाही जिल्हास्तरावरून करण्यात आली. बदलीच्या ऑनलाईन पोर्टलवर एका जिल्ह्यातून दुसऱ्या जिल्ह्यातील बदलीसाठी ही प्रक्रिया राबवली. त्यासाठी शिक्षकांना संकेतस्थळावर लॉगीन आयडी आणि पासवर्ड उपलब्ध करून दिला होता. शिक्षकांच्या आंतरजिल्हा बदल्या ऑनलाईन प्रणालीद्वारे करण्याचा निर्णय शासनाच्या ७ एप्रिल २०२१ च्या निर्णयानुसार राबवण्यात आला.
