मुंबई : मुंबई येथील शिवाजी महाराज आंतरराष्ट्रीय विमानतळ स्फोटाने उडवून देण्याची धमकी इंडियन मुजाहिद्दीन या दहशतवादी संघटनेने काल सोमवारी (ता.६) रात्री दहा वाजण्याच्या सुमारास दिली. यामुळे सुरक्षा यंत्रणा सतर्क झाली असून मुंबई विमानतळावर कडेकोट बंदोबस्त ठेवण्यात आला आहे.
पोलिसांनी दिलेल्या माहितीनुसार, मुंबई विमानतळावर एका अनोळखी व्यक्तीने फोन करून विमानतळ स्फोटकाने उडवून टाकू अशी धमकी दिली. फोन करणाऱ्या व्यक्तीने आपले नाव इरफान अहमद शेख असे सांगून आपण इंडियन मुजाहिद्दीनचे सदस्य असल्याचे सांगितले आहे.
त्यानंतर विमानतळावरील कर्मचाऱ्यांनी याची माहिती मुंबई पोलीस व सुरक्षा यंत्रणांना दिली. यामुळे यंत्रणा देखील सतर्क झाल्या असून विमानतळाच्या सुरक्षेत वाढ करण्यात आली आहे.
दरम्यान, याप्रकरणी सहारा पोलीस ठाण्यात अज्ञात व्यक्ती विरोधात गुन्हा दाखल केला आहे. पुढील तपास मुंबई पोलीस करीत आहेत.
