पिंपरी चिंचवड : येथील बिजलीनगर परिसरात किरकोळ कारणावरून झालेल्या वादातून मित्रानेच मित्राची मांडीत चाकू भोसकून हत्या केल्याची घटना उजेडात आली आहे.
कमल किशोर भट असे आरोपी मित्राचे नाव असून, त्याने प्रकाश मेहत्रे याची हत्या केली. याप्रकरणी कमल किशोर भटला चिंचवड पोलिसांनी ताब्यात घेतले आहे. किरकोळ कारणावरून झालेल्या वादातून कमल भट यीने प्रकाश मेहत्रे याच्या मांडीत चाकू भोसकून त्याची हत्या केली.
याबाबत पोलिसांनी दिलेल्या माहितीनुसार, कमल किशोर भट आणि हत्या झालेला प्रकाश मेहत्रे दोघेही मित्र आहेत. भट यांच्यावर आर्म अॅक्टसह इतर किरकोळ गुन्हे दाखल आहेत. दोन्ही मित्र एकत्र मद्यपान करत असत. गेल्या पंधरा दिवसांपासून मृत प्रकाश मेहत्रे घरी गेला नव्हता. तर भट हा बेघर आहे.
दरम्यान, सोमवारी दुपारी बिजलीनगर या ठिकाणी एकत्र जेवण केल्यानंतर त्यांच्यात किरकोळ कारणावरून वाद झाला. दोघांनी एकमेकांना शिवीगाळ केली. यातूनच कमल किशोर भटने चाकूने प्रकाश मेहेत्रेच्या मांडीवर वार केले. यात गंभीर जखमी होऊन प्रकाश मेहेत्रेचा मृत्यू झाला आहे.
याप्रकरणी कमल किशोर भटला चिंचवड पोलिसांनी ताब्यात घेतले आहे.
