पुणे : राज्यात नाही तर देशात ट्रेनी IAS अधिकारी पूजा खेडकर यांची चर्चा सुरु आहे. पूजा खेडकर यांचे एकेक कारनामे समोर येत आहे. कोट्यवधींची संपत्ती, अलिशान कार, गाडी, बंगला, फ्लॅटस आणि आरामदायी लाईफस्टाईल असतानाही नॉन क्रिमिलियर प्रमाणपत्र मिळवलं आहे. अंध-अपंगांच्या प्रमाणपत्रावर सनदी अधिकारी बनल्या आहेत.
वडिलांच्या पाऊलावर पाऊल टाकत अधिकारी होण्याचं स्वप्न पूजा खेडकर यांनी बाळगलं, पण त्यासाठी चुकीचा मार्ग निवडला आहे. त्यातच, त्यांच्या आईचा एक वादग्रस्त बंदुकधारी व्हिडिओ समोर आला होता. तसेच, पुण्यातील बाणेर रोडवरील बंगल्याच्या जागेत त्यांनी अनधिकृतपणे सरकारी जागेवर अतिक्रमण केल्याचं उघड झाले आहे. आता, याप्रकरणी पुणे महापालिकेनं त्यांच्या घरावर नोटीस चिटकवली आहे.
खेडकर कुटुंबीयांकडून पुण्यातील बाणेर भागातील त्यांच्या बंगल्याच्या बाहेर असलेल्या फुटपाथवर अतिक्रमण करण्यात आल आहे. फुटपाथवर कठडे करून त्यात झाडें लावण्यात आली आहेत. खेडकर कुटुंबाचे एकेक कारनामे उघड झाल्यानंतर पुणे महापालिकेने हे अतिक्रमण काढून टाकण्याची नोटीस खेडकर यांच्या बंगल्यावर चिकटवली आहे. खेडकर कुटुंबीयांनी पुढील 7 दिवसांत अतिक्रमण काढून न घेतल्यास कारवाईचा इशारा देण्यात आला आहे.
पूजा खेडकर अकोल्यात प्रकल्प अधिकारी
पूजा खेडकर ह्या पुणे इथं प्रशिक्षणार्थी काळात असताना वादाच्या भोवऱ्यात अडकल्या होत्या. त्यानंतर पूजा खेडकर यांना प्रशिक्षणार्थी म्हणून वाशिम जिल्हाधिकारी कार्यालयावर सहायक जिल्हाधिकारी म्हणून बदली करण्यात आली होती. पहिल्याच दिवशी त्यांनी वाशिमच्या जिल्हाधिकारी एस.बूवनेश्वरी यांची भेट घेऊन वाशिमच्या जलसंपदा विभागासह 12 जुलै रोजी कार्यकारी अभियंता सार्वजनिक बांधकाम विभाग यांचे प्रशिक्षण घेतले. इथून पुढे आठवड्याचे पहिले दिवशी म्हणजेच सोमवार 15 जुलै पासून 19 जुलैपर्यंत अकोला येथील प्रकल्प अधिकारी आदिवासी विभाग म्हणून आठवडाभर कामकाज प्रशिक्षण करिता हजर होणार आहेत.
शल्य चिकित्सकांची चौकशी व्हावी
पुजा खेडकर यांनी दिव्यांग असल्याचं सर्टिफिकेट मिळवलंय ते अहमदनगर जिल्हा रुग्णालयातुन. 2021 साली मिळवलेल्या या सर्टिफिकेटमध्ये त्यांना दृष्टीदोष असल्याचं आणि मानसिक विकलांगता असल्याचं म्हटलं आहे. त्यामुळे अहमदनगरच्या या जिल्हा रुग्णालयांतील तत्कालीन जिल्हा शल्य चिकित्सकांची चौकशी करण्याची मागणी आरटीआय कार्यकर्ते विजय कुंभार यांनी केलीय.
दोषी आढळल्यास कारवाई करण्याची मागणी
वादग्रस्त ट्रेनी IAS अधिकारी पुजा खेडकर या दोषी आढळल्यास त्यांच्यावर कारवाई करण्याची मागणी राष्ट्रीय दृष्टीहीन संघाकडून करण्यात आली आहे. पुजा खेडकर यांनी जर अंध असल्याचं खोटं प्रमाणपत्र सादर केलं असेल तर त्यांनी एका खऱ्या अंध व्यक्तीवर अन्याय केलाय, असं या संघटनेचे सदस्य असलेल्या अंध व्यक्तींच म्हणणं आहे.
एखाद्या व्यक्तीला किमान चाळीस टक्के दृष्टीदोष असला तरच त्या व्यक्तीला दिव्यंगत्वाचे प्रमाणपत्र मिळते आणि अशी व्यक्ती कार चालवणं तर दुरच, पण लिहू-वाचू देखील शकत नाही, असेही या अंध व्यक्तींच म्हणणं आहे. त्यामुळे पुजा खेडकर यांनी प्रमाणात कसं मिळवलं असा प्रश्न आता अंध संघटनेकडून विचारण्यात आला आहे.
