पुणे : धावत्या रेल्वेमध्ये जीव धोक्यात घालून चढणारे आणि स्टंटबाजी करून जीव गमावणारे महाभाग काही कमी नाहीत. पुणे रेल्वे स्थानकावर देखील असाच हादरवणारा प्रकार घडला. दुपारची वेळ. फलाटावरून वेगाने एक्स्प्रेस गाडी पुढे जात असतानाच धावत-पळत आलेला एक प्रवासी गाडी पकडण्याचा आटोकाट प्रयत्न करत होता. त्याचवेळी अनर्थ घडला. धावताना तोल जाऊन तो फलाट आणि गाडीच्या मध्ये पडला. हे दृश्य पाहणाऱ्यांच्या जीवाचा ठोका चुकला. मरण डोळ्यांसमोर उभे ठाकलेले असतानाच चमत्कार घडला. रेल्वे सुरक्षा दलाच्या जवानाने प्रसंगावधान राखत क्षणाचाही विलंब न करता या प्रवाशाला वीजेच्या वेगाने ओढून बाहेर काढले अन् प्रवाशाचा जीव वाचला.
एखाद्या थरारक चित्रपटाला शोभेल असेच कथानक पुणे रेल्वे स्थानकावर प्रवाशांनी अनुभवले. प्रवाशाचा जीव वाचविणाऱ्या जवानाचे नाव दिगंबर देसाई असे आहे. देसाई हे पुणे रेल्वे स्थानकावर बंदोबस्ताला आहेत. ते बुधवारी (ता. २७) नेहमीप्रमाणे स्थानकावर त्यांचे कर्तव्य पार पाडत होते. गुरूवारी (ता. २९) दुपारी १२ वाजण्याच्या सुमारास फलाट क्रमांक तीनवर उद्यान एक्स्प्रेस येणार असल्याची उद्घोषणा झाली. गाडी फलाटावरून काही मिनिटांतच मार्गस्थ होत असतानाच एक प्रवासी धावत-पळत फलाटावर आला. त्याने धावत्या गाडीत चढण्याचा प्रयत्न केला; परंतु तो फलाट आणि गाडी यांच्यामध्ये पडला. हे दृश्य फलाटावरील शेकडो लोकांनी पाहिले आणि प्रत्येकाच्या काळजाचा ठोकाच चुकला.
दरम्यान, बंदोबस्तावर असलेल्या देसाई यांनी देखील हे दृश्य पाहिले. त्यांनी तत्काळ धाव घेत त्या प्रवाशाला वर ओढून घेतले. त्यामुळे त्या प्रवाशाचा जीव वाचला. देसाई यांनी प्रसंगावधान दाखवून कृती केली नसती तर त्या प्रवाशाचे प्राण गेले असते, अशी प्रतिक्रिया प्रवाशांनी व्यक्त केली. प्रवाशाला सुरक्षितपणे बाहेर काढल्यानंतर दुसऱ्या गाडीत बसविण्यात आले, अशी माहिती रेल्वे प्रशासनाने दिली.
मध्य रेल्वेचे (पुणे) जनसंपर्क अधिकारी राम पॉल बडपग्गा म्हणाले की, प्रवाशांनी धावत्या रेल्वे गाड्यांमध्ये चढण्याचा अथवा उतरण्याचा प्रयत्न करू नये. यातून प्रवासी स्वत:च्याच जिवाला धोका निर्माण करीत आहेत. प्रवाशांनी सुरक्षित प्रवासाला प्राधान्य द्यावे.
