पिंपरी (पुणे): ‘रिक्षात बसू नका’ असे म्हटल्याने पाच जणांच्या टोळक्याने परिसरातील चारचाकी वाहने फोडत दहशत माजवली. ही घटना बुधवारी (दि. ३०) रात्री नऊ वाजण्याच्या सुमारास पाण्याच्या टाकीजवळ सुदर्शन कॉलनी, थेरगाव येथे घडली. याप्रकरणी सिद्धार्थ शिवाजी इगवे (वय २९, रा. थेरगाव) यांनी वाकड (काळेवाडी) पोलीस ठाण्यात फिर्याद दिली आहे. त्यानुसार, रोहित जाधव, प्रथमेश जाधव, यश चौधरी, सक्षम मोरे व समीर पवार यांच्यावर गुन्हा दाखल केला आहे.
पोलिसांनी दिलेल्या माहितीनुसार, फिर्यादी यांनी त्यांची रिक्षा (एमएच १४, जेपी ८३८९) सुदर्शन कॉलनी येथे पार्क केली होती. संशयित त्याठिकाणी येऊन त्यांच्या रिक्षामध्ये बसले. त्यावेळी फिर्यादी यांनी रिक्षामध्ये बसू नका येथून निघून जा, असे म्हटले. याचा राग आल्याने संशयितांनी हातात लोखंडी रॉड घेऊन फिर्यादी यांच्याशी भांडण केले. तसेच लोखंडी रॉड हवेत फिरवत परिसरात दहशत माजवली. फिर्यादी यांची रिक्षा तसेच परिसरात पार्क केलेली इतर चार वाहने फोडत सुमारे १ लाख १० हजार रुपयांचे नुकसान केले.
