अक्षय टेमगिरे
शिरूर : शिरूर तालुक्यातील माळवदेवस्ती, कवठे यमाई येथे दुचाकीवरून आलेल्या दोन चोरट्यांनी दोन महिलांच्या गळ्यातील सोन्याचे दागिने ओढून चोरी केल्याची घटना घडली आहे. या प्रकरणी शिरूर पोलिस ठाण्यात गुन्हा दाखल करण्यात आला आहे.
फिर्यादी पुणाबाई भीमा पडवळ (वय 77, रा. माळवदेवस्ती, कवठे यमाई, ता. शिरूर) यांनी दिलेल्या फिर्यादीवरून हा गुन्हा दाखल करण्यात आला असून, ही घटना दि. 4 ऑक्टोबर रोजी दुपारी सुमारास 4 ते 5 वाजेच्या दरम्यान घडली. फिर्यादी गुरे चारत असताना 20 ते 25 वयोगटातील दोन अज्ञात चोरटे मोटारसायकलवरून आले आणि त्यांनी त्यांच्या गळ्यातील दोन सोन्याचे दागिने झटपट ओढून नेले.
त्यानंतर याचदरम्यान सविंदणे गावातील सीताबाई बाळासाहेब पोखरकर या महिला पुलाजवळ असताना त्यांच्याही गळ्यातील सोन्याचे मणी असलेले दोरीतील दागिने चोरट्यांनी झडप घालून ओढून नेले. चोरट्यांनी केलेल्या या दोन चोरीत मिळून एकूण 1 लाख 72 हजार 975 रुपयांचा ऐवज लंपास झाला आहे.
चोरी केलेला ऐवज
1.सोन्याचे मंगळसूत्र (8.5 ग्रॅम) किंमत 79 हजार 475 रुपये
2.सोन्याचा बदामासह दागिना (6 ग्रॅम) किंमत 56 हजार 100 रुपये
3.सोन्याचे गोल मणी (8.4 ग्रॅम) किंमत 37 हजार 400 रुपये
दरम्यान, या घटनेचा पुढील तपास शिरूर पोलीस स्टेशनचे पोलीस निरीक्षक संदेश केंजळे यांच्या मार्गदर्शनाखाली पो.स. ई चव्हाण हे करत आहेत.
