पुणे : खासगी वित्तीय संस्थेत काम करणाऱ्या तरुणीशी अश्लील वर्तन केल्याप्रकरणी येरवडा पोलिसांनी व्यवस्थापकाविरुद्ध शनिवारी (दि. २६) गुन्हा दाखल केला. यासंदर्भात पीडित तरुणीने कंपनीतील महिला तक्रार निवारण समितीकडे तक्रारही दिले होती. त्यानंतर येरवडा पोलीस ठाण्यात या गुन्ह्याची नोंद करण्यात आली. व्यवस्थापक शुभम दुबे (वय ३४) असे गुन्हा दाखल करण्यात आलेल्याचे नाव आहे.
पीडित तरुणी येरवडा भागातील आयटी पार्क परिसरात नोकरीस आहे. त्या कंपनीत संस्थेत दुबे व्यवस्थापक आहे. त्याने या तरुणीचा अनेकदा विनयभंग केला. तसेच तिच्याशी अश्लील वर्तन करण्याचा प्रयत्न केला. त्याच्या त्रासामुळे या तरुणीने वित्तीय संस्थेतील महिला तक्रार निवारण समितीकडे तक्रार दिली. मात्र, समितीने तिच्या तक्रारीची दखल न घेता प्रकरण दडपण्याचा प्रयत्न केला. त्यानंतर आरोपी दुबे याने तरुणीला पुन्हा त्रास देण्यास सुरुवात केली. त्यामुळे, भेदरलेल्या या तरुणीने येरवडा पोलीस ठाण्यात फिर्याद नोंदवली.
