Girish Bapat Passed Away : पुणे – पुणे लोकसभा खासदार व राज्याचे माजी मंत्री गिरीश बापट (वय- ७४) आजाराने बुधवारी (ता. २९) दुपारी सव्वा बारा वाजण्याच्या सुमारास निधन झाले आहे.
गिरीश बापट यांची प्रकृती अचानक खालावल्याने त्यांना पुणे शहरातील दीनानाथ मंगेशकर रुग्णालयात दाखल करण्यात आले होते. दरम्यान त्यांनी रुग्णालयातील आयसीयूमध्ये लाइफ सपोर्टवर ठेवण्यात आले होते. बापट हे गेल्या काही दिवसांपासून आजारी होते.
खासदार गिरीश बापट यांचे निधन झाल्याची माहिती भाजप शहराध्यक्ष जगदीश मुळीक यांनी दिली. दरम्यान गिरीष बापट यांच्या पश्चात कुटुंबात एक मुलगा आणि पत्नी आहे.
त्यांचे पार्थिव अंत्यदर्शनासाठी शनिवार पेठेतील निवासस्थानी ठेवण्यात येणार आहे. तसेच आज सायंकाळी सात वाजता पुण्यातील वैकुंठभूमी येथे त्यांच्यावर अंत्यसंस्कार करण्यात येणार आहेत.
गिरीष बापट यांची राजकिय कारकिर्द…
पुण्यातील कसबा पेठ मतदारसंघात किंगमेकर अशी ओळख होती. गिरीश बापट हे मूळचे राष्ट्रीय स्वयंसेवक संघाचे स्वयंसेवक राहिले आहेत. जनसंघापासून ते राजकारणात उतरले. नगरसेवक पदापासून सुरुवात केलेले गिरीश बापट यांनी 1995 मध्ये आमदारकीची पहिल्यांदा निवडणूक लढविली अन्‌ पुढे सलग 2014 पर्यंत ते पाच वेळा आमदार म्हणून निवडून आले.
यानंतर 1996 साली त्यांना भाजपाने पुण्यातून लोकसभेची उमेदवारी जाहीर केली होती. पण बापट यांचा पराभव झाला आणि काँग्रेसचे सुरेश कलमाडी खासदार झाले. 2014 मध्ये गिरीश बापट यांना लोकसभा निवडणूक लढवायची होती. मात्र, पक्षाने अनिल शिरोळे यांना उमेदवारी दिल्यामुळे त्यांची संधी हुकली. परंतु, 2019 मध्ये योग्यपणे मोर्चेबांधणी करत त्यांनी खासदारकीचे तिकीट मिळवले. त्यानंतर निवडणुकीत त्यांनी काँग्रेसच्या मोहन जोशी यांचा तब्बल 96 हजार मतांनी पराभव केला.
