Fursungi : पुणे महानगरपालिकेच्या अतिक्रमण कारवाईदरम्यान फुरसुंगी परिसरात मोठा गोंधळ उडाल्याची घटना समोर आली आहे. भाजी विक्रेत्यांनी कारवाईला विरोध करत महापालिका पथकावर दगडफेक केल्याने सुरक्षा रक्षक जखमी झाले असून, वाहनांची तोडफोडही करण्यात आली. या प्रकरणी संबंधित आरोपींविरोधात फुरसुंगी पोलीस ठाण्यात 5 जणांवर गुन्हा दाखल करण्यात आला आहे.
शितल महेश डांगे, रेखा सुदेश रोकडे, शाहिन मियासाहेब शेख, उषा दादाराव गायकवाड व सोनु सुदेश रोकडे अशी गुन्हा दाखल करण्यात आलेल्या आरोपींची नावे आहेत. याप्रकरणी अमोल हरिदास लावंड (वय 41) यांनी फुरसुंगी पोलीस ठाण्यात फिर्याद दिली आहे. पोलिसांनी दिलेल्या माहितीनुसार, फिर्यादी अमोल लावंड हे पुणे महानगरपालिकेत सहाय्यक अतिक्रमण निरीक्षक म्हणून कार्यरत असून, कोंढवा-ऊंड्री क्षेत्रीय कार्यालयात गेल्या तीन महिन्यांपासून सेवा बजावत आहेत.
16 एप्रिल रोजी सायंकाळी सुमारे 4 वाजता ते आपल्या पथकासह अतिक्रमण हटविण्याच्या कारवाईसाठी रवाना झाले होते. या पथकात सहाय्यक अतिक्रमण निरीक्षक गंगाधर माने, कर्मचारी किसन गवळी, महाराष्ट्र सुरक्षा बलाचे सुरक्षा रक्षक तसेच ठेकेदारांचे कर्मचारी यांचा समावेश होता. पथकाने ऊंड्री चौक परिसरात कारवाई केल्यानंतर सायंकाळी 7 वाजण्याच्या सुमारास डी-मार्टसमोरील हांडेवाडी चौक येथे कारवाई सुरू केली.
यावेळी रस्त्यावर अतिक्रमण करून बसलेल्या भाजी विक्रेत्यांवर कारवाई करण्यात आली. त्यांच्या ताब्यातील वजनकाटे व भाजीपाल्याच्या कॅरेट जप्त करून ट्रकमध्ये भरले जात असताना, अचानक 3 ते 4 महिला आणि 2 पुरुषांनी कारवाईला तीव्र विरोध केला. सदर व्यक्तींनी महापालिका पथकाला अडवत ट्रक पुढे जाऊ दिला नाही. यावेळी एका इसमाने 17 सिटर बसच्या काचांवर बुक्क्यांनी प्रहार केला, तर दुसऱ्या इसमाने दगडफेक करत वाहनाची काच फोडली. याच दगडफेकीत महाराष्ट्र सुरक्षा बलाचे रक्षक अंबादास पोमण आणि सचिन पुंदे जखमी झाले.
दरम्यान, या घटनेमुळे काही काळ परिसरात तणाव निर्माण झाला. पथकाने तात्काळ पोलीस नियंत्रण कक्षाला माहिती दिल्यानंतर फुरसुंगी पोलिस घटनास्थळी दाखल झाले आणि परिस्थिती नियंत्रणात आणली. पोलिसांनी घटनास्थळी उपस्थित असलेल्या काही महिलांना ताब्यात घेतले. त्यावेळी त्यांनी आपली नावे शीतल डांगे, रेखा रोकडे, शाहीन शेख आणि उषा गायकवाड अशी सांगितली. तसेच दगडफेक करणाऱ्या सोनू रोकडे याचे नाव समोर आले असून, आणखी एक अज्ञात इसमही या प्रकारात सहभागी असल्याचे स्पष्ट झाले आहे.
फिर्यादी लावंड यांनी दिलेल्या तक्रारीनुसार, संबंधित आरोपींनी सरकारी कामात अडथळा आणत “तुम्हाला येथून जाऊ देणार नाही, तुमचा राजीनामा घेऊ,” अशा धमक्या दिल्या. तसेच महिलांवर धक्काबुक्की केल्याचा खोटा आरोप करत गुन्हा दाखल करण्याची धमकीही दिली. या प्रकरणी फुरसुंगी पोलीस ठाण्यात भारतीय न्याय संहिता (BNS) 2023 अंतर्गत कलम 121(1), 132, 221, 3(5), 324(4), 351(2) नुसार गुन्हा दाखल करण्यात आला आहे.
