पुणे: आळंदी येथील देहू फाटा परिसरात एका 19 वर्षीय विद्यार्थिनीसोबत गैरवर्तन करण्याचा प्रकार समोर आल्याने परिसरात संतापाचे वातावरण निर्माण झाले आहे. तरुणीला रस्त्यात अडवून अश्लील हातवारे करत वाहनावर बसण्याचे संकेत देणाऱ्या एका संशयित व्यक्तीला स्थानिक नागरिकांनी पकडून पोलिसांच्या ताब्यात दिले.
मिळालेल्या माहितीनुसार, संबंधित विद्यार्थिनी कॉलेज परिसरातून जात असताना आरोपी तिच्यावर लक्ष ठेवून होता. त्याने तरुणीकडे पाहून अयोग्य आणि अश्लील स्वरूपाचे हातवारे केल्याचा आरोप आहे. तसेच तिला आपल्या वाहनावर बसण्याचे इशारे केल्याचेही सांगितले जात आहे. या अचानक घडलेल्या प्रकारामुळे विद्यार्थिनी घाबरून गेली.
घटनेची माहिती मिळताच परिसरातील काही जागरूक नागरिक आणि तरुण तातडीने घटनास्थळी पोहोचले. दरम्यान, संशयित व्यक्ती तेथून पळून जाण्याचा प्रयत्न करत होता. मात्र नागरिकांनी त्याचा पाठलाग करून त्याला पकडले. संतप्त नागरिकांनी त्याला चांगलाच जाब विचारला आणि पुढील कारवाईसाठी दिघी पोलिसांच्या स्वाधीन केले.
या घटनेचा व्हिडिओ सोशल मीडियावर मोठ्या प्रमाणात व्हायरल झाला असून त्यावर विविध स्तरांतून प्रतिक्रिया उमटत आहेत. महिला सुरक्षेचा प्रश्न पुन्हा एकदा चर्चेत आला असून अशा प्रकारांवर कठोर कारवाई करण्याची मागणी नागरिकांकडून होत आहे.
दरम्यान, पोलिसांनी संशयिताला ताब्यात घेऊन चौकशी सुरू केली आहे. घटनेबाबत अधिक तपास सुरू असून संबंधित तरुणीचा जबाब आणि इतर पुराव्यांच्या आधारे पुढील कायदेशीर कारवाई करण्यात येणार आहे.
