पुणे : सरकारी वैद्यकीय महाविद्यालयांतील विद्यार्थी वसतिगृहांची दुरुस्ती आणि इतर कामांसाठी निधी देण्याचे अखेर सरकारने मंजूर केले. याचबरोबर नवीन वसतिगृहे बांधण्यासही निधी देण्यासोबत नवीन वसतिगृहांचे काम पूर्ण होईपर्यंत इमारती भाड्याने घेऊन तात्पुरती वसतिगृहे उभारण्याचेही सरकारने जाहीर केले. वैद्यकीय शिक्षण संचालनालयाने बी. जे. वैद्यकीय महाविद्यालयासह सर्व सरकारी वैद्यकीय महाविद्यालयांना याबाबत पत्राद्वारे निर्देश दिले. तसेच महाविद्यालयाच्या परिसरात खासगी इमारती भाड्याने घेऊन वसतिगृहाची सोय करण्याची सूचनाही करण्यात आली आहे.
महाराष्ट्र राज्य निवासी डॉक्टर संघटनेने (मार्ड) विविध मागण्यांसाठी नुकताच संप पुकारला होता. त्यावेळी मार्डच्या शिष्टमंडळासोबत उपमुख्यमंत्री अजित पवार आणि वैद्यकीय शिक्षण मंत्री हसन मुश्रीफ यांनी चर्चा केली होती. या सकारात्मक चर्चेनंतर मार्डने संप मागे घेतला होता. सरकारी वैद्यकीय महाविद्यालयांतील विद्यार्थी वसतिगृहांची दुरुस्ती आणि इतर कामांसाठी निधी देण्याचे सरकारने मंजूर केले. याचबरोबर नवीन वसतिगृहे बांधण्यासही निधी देण्यासोबत नवीन वसतिगृहांचे काम पूर्ण होईपर्यंत इमारती भाड्याने घेऊन तात्पुरती वसतिगृहे उभारण्याचेही सरकारने जाहीर केले.
या वैद्यकीय शिक्षण संचालनालयाने सर्व वैद्यकीय महाविद्यालयांना पत्र पाठविले आहे. त्यात निवासी डॉक्टरांच्या वसतिगृहाचा आढावा घेण्यास सांगण्यात आले. निवासी डॉक्टरांची संख्या, वसतिगृहांची क्षमता, नवीन वसतिगृहांचे बांधकाम या गोष्टींचा यात समावेश आहे. निवासी डॉक्टरांसाठी वसतिगृहाची पर्यायी सुविधा न झाल्यास महाविद्यालयाच्या परिसरात भाड्याने इमारती घेऊन तिथे सुविधा सुरू करावी, असे निर्देश दिल्याची माहिती सूत्रांकडून मिळाली. वैद्यकीय महाविद्यालयांनी निवासी डॉक्टरांना वसतिगृहाच्या सुविधेसाठी खासगी इमारती भाड्याने घेण्याबाबत प्रस्ताव पाठविण्यास सांगण्यात आले आहे. यासाठी किती खर्च येणार याची माहितीही मागविण्यात आली आहे. या खर्चास वित्त विभागाची मंजुरी घेऊन तातडीने खासगी इमारतीत भाड्याने वसतिगृहे सुरू केली जाणार असल्याचे सूत्रांनी सांगितले.
याविषयी बोलताना बी.जे.वैद्यकीय महाविद्यालयाचे प्रभारी अधिष्ठाता डॉ. श्रीनिवास शिंत्रे म्हणाले की, निवासी डॉक्टरांसाठी सध्या आमच्याकडे वसतिगृहाची सुविधा पुरेशी आहे. नवीन प्रवेश घेणाऱ्या विद्यार्थ्यांना मात्र वसतिगृहासाठी अडचणी येऊ शकतात. कारण कोरोना संकटामुळे विद्यार्थ्यांचे शैक्षणिक वर्ष पुढे ढकलले गेल्याने आधीचे विद्यार्थी बाहेर पडण्याआधी नवीन विद्यार्थी दाखल होतील.
