शिक्रापूर : शिरुर तालुक्यात अनेक ठिकाणी पिकअपच्या धडकेने अपघात होण्याच्या घटना घडत असताना नुकतेच एका दाम्पत्याला पिकअपची धडक बसून झालेल्या अपघातात आई-वडील जखमी झाले. मात्र, यामध्ये चार वर्षीय बालिकेचा दुर्दैवी मृत्यू झाला. पोलिसांनी दिलेल्या माहितीनुसार या अपघातात वैभव विजय साबळे व श्रद्धा वैभव साबळे हे दांपत्य जखमी झाले, तर प्राप्ती वैभव साबळे (वय ४ रा. साईपार्क सोसायटी शिक्रापूर ता. शिरुर जि. पुणे) या बालिकेचा मृत्यू झाला.
मुखई (ता. शिरुर) येथील कै. रामराव गेनुजी पलांडे महाविद्यालयचे प्राध्यापक वैभव साबळे हे त्यांच्या पत्नी व मुलीसह दुचाकीने पाबळ बाजूने शिक्रापूरकडे येत असताना शिक्रापूर बाजूने भरधाव वेगाने बैलगाडा शर्यतीची बैले घेऊन जाणाऱ्या पिकअपची साबळे यांच्या दुचाकीला जोरदार धडक बसून अपघात झाला. या अपघातामध्ये वैभव साबळे, श्रद्धा साबळे तसेच त्यांची चार वर्षीय बालिका प्राप्ती वैभव साबळे हे तिघे जखमी झाले, तर पिकअप चालक पिकअप घेऊन पाबळच्या दिशेने पळून गेला. त्याच्यावर पोलिसांनी गुन्हा दाखल केला आहे.
यावेळी नागरिकांनी जखमींना उपचारासाठी पुणे येथील रुग्णालयात दाखल केले. मात्र, उपचारादरम्यान प्राप्ती साबळे या बालिकेचा मृत्यू झाला. याबाबत विजय दादाभाऊ साबळे (वय ५५ रा. मुळेवाडी रोड मंचर) यांनी शिक्रापूर पोलीस स्टेशन येथे फिर्याद दिली.
