सागर जगदाळे
भिगवण : डाळज नं २ (भिगवण) या ठिकाणी दुचाकी व कारच्या धडकेत दुचाकीवरील दोन तरुण गंभीर जखमी झाले आहेत. आज सकाळी आठ वाजण्याच्या सुमारास हा अपघात झाला.
अपघात स्थळावरून मिळालेल्या माहितीनुसार, संतोष दादा पिसे (वय ३१), विनोद पांडुरंग पिसे (वय २४, दोघेही रा. येसवडी, ता. कर्जत, जि. अहमदनगर) हे दोन तरुण या अपघातात गंभीर जखमी झाले आहेत. हे दोन तरुण आपल्या ताब्यातील दुचाकीवरून (क्र. एमएच १६ डीएच८३६७) कळसमार्गे भिगवणकडे जाण्यासाठी निघाले होते. त्यांची दुचाकी डाळज नं २ याठिकाणी सोलापूर-पुणे महामार्गावर आली असता, भरधाव वेगाने सोलापूरकडून पुण्याच्या दिशेने निघालेल्या चारचाकीने (क्र. एमएच ४५ एयू २०१९) त्यांना पाठीमागून जोरदार धडक दिली. या धडकेत दुचाकी सुमारे ५० ते ६० फूट लांब घसरत गेली.
अपघाताचे वृत्त कळताच ‘आपुलकीची सेवा’ अॅम्बुलन्सचे चालक केतन वाघ यांनी तत्काळ अपघातस्थळी जाऊन गंभीर जखमी युवकांना आपल्या अॅम्बुलन्समधून पुढील उपचारासाठी भिगवण येथे आयसीयू हॉस्पिटलमध्ये दाखल केले. त्यांच्यावर पुढील उपचार सुरू आहेत.
