मुंढवा (पुणे): प्रचंड वाहतूक कोंडी, वाहनांच्या लांबच लांब रांगा, इंधनाचा अपव्यव, प्रचंड मनस्ताप हा रोजचा अनुभव मुंढवा केशवनगर चौकात वाहन चालकांना अनुभवायला भेटत आहे. नागरिकांच्या समस्यांची दखल घेऊन शिवसेना शहर प्रमुख प्रमोद भानगिरे यांनी केलेल्या रास्ता रोको आंदोलनाची पुणे महापालिकेला दखल घेणे भाग पडले आहे. मुंढवा- केशवनगर चौकात भुयारी मार्गासाठी पाच कोटी रुपयांची तरतूद झाली असल्याने शिवसेनेच्या आंदोलनाला यश आले आहे.
मुंढवा-केशवनगर चौकात सततच्या वाहतूक कोंडीमुळे नागरिक व वाहनचालक प्रचंड हैराण झाले होते. तासनतास वाहनांच्या रांगा लागत असल्याने इंधनाचा मोठ्या प्रमाणात अपव्यय होतो. या नागरिकांच्या तक्रारींची दखल घेऊन शिवसेना शहरप्रमुख माजी नगरसेवक प्रमोद नाना भानगिरे यांनी 15 डिसेंबर रास्ता रोको आंदोलन करत प्रशासनाविरोधात आक्रमक पवित्रा घेतला. अनेक वर्षांपासून हा प्रश्न रखडला असताना राजकारण्यांनी व प्रशासनाने दुर्लक्ष केले होते. भानगिरे यांनी तातडीने आंदोलन केल्याने महापालिका आयुक्त विक्रम कुमार यांनी येथील भुयारी मार्गासाठी पाच कोटी रुपयांची तरतूद केली.
उपनगर झपाट्याने वाढत असताना पालिकेत समाविष्ट नव्या गावांचे नागरी प्रश्न प्रलंबित आहेत. महापालिकेत प्रशासक असल्याने सर्व नगरसेवक माजी झाले आहेत. त्यामुळे दाद कोणाकडे मागायची, हा प्रश्न नागरिकांसमोर आहे. परंतु, राजकीय साठमारी बाजूला ठेऊन नाना भानगिरे यांनी हडपसर विधानसभा मतदारसंघातील प्रलंबित प्रश्न सोडविण्यासाठी मुख्यमंत्री एकनाथ शिंदे यांच्याकडे पाठपुरावा केला आहे.
