पुणे : शिवाजीनगर रेल्वे स्थानकातून सोमवारी दुपारी दीड वाजता पहिली लोकल तळेगावकडे रवाना झाली. पुणे रेल्वे प्रशासनाने शिवाजीनगर रेल्वे स्टेशन येथे लोकलसाठी स्वतंत्र लेन तयार केली आहे. या लेनचे काम पूर्ण झाल्यानंतर टर्मिनल व लोकल सेवेला सुरुवात झाली. रेल्वे अधिकारी आणि लोकप्रतिनिधी लोकलला हिरवा झेंडा दाखवला.
पुणे रेल्वे स्टेशनवरून लोणावळ्यासाठी दिवसाला साधारण ४० लोकल सुटतात. त्यामुळे पुणे रेल्वे स्टेशन येथे प्रवाशांची मोठी गर्दी असते. तेथील भार कमी करण्यासाठी शिवाजनगर रेल्वे स्टेशन येथे लोकलसाठी स्वतंत्र प्लॅटफॉर्म तयार करण्यास काही महिन्यांपूर्वी प्रशासनाने सुरुवात केली होती. यानंतर नुकतेच या नवीन लोकलचा मार्ग व प्लॅटफॉर्मचे काम पूर्ण झाले होते. त्यानुसार सोमवारी दुपारी शिवाजीनगर येथून पहिल्या लोकलला हिरवा झेंडा दाखविण्यात आला. त्यामुळे पुणे स्टेशनवरील ताण कमी होण्यात मदत होणार आहे.
यावेळी आमदार सिद्धार्थ शिरोळे, सुनील कांबळे, गणेश बीडकर, गौरव बापट, पुणे रेल्वे विभागाचे अप्पर व्यवस्थापक बी. के. सिंह, वाणिज्य व्यवस्थापक डॉ. मिलिंद हिरवे आदी उपस्थित होते. पुणे रेल्वे विभागाच्या प्रमुख इंदुराणी दुबे या देखील या कार्यक्रमाला उपस्थित नव्हत्या. यामुळे उद्घाटन कार्यक्रमावेळी चर्चा रंगली होती.
दरम्यान, शिवाजीनगर येथे नव्याने उभारण्यात आलेल्या टर्मिनलची लांबी ३३० मीटर आहे. या ठिकाणाहून १२ डब्यांची लोकल धावू शकते. तसेच, मंगळवार (ता. ०७) लोणावळ्यासाठी येथून एकूण चार लोकल धावणार आहेत.
असे असेल वेळापत्रक…
शिवाजीनगर ते लोणावळा
सकाळी ६.३५ वा.
सायंकाळी ५.१५ वा.
रात्री ८.३५ आणि ९.०५ वा.
———-
लोणावळा ते शिवाजीनगर
दुपारी ३.३० वा. सायंकाळी ७.०० आणि ७.३५ वा.
रात्री १०.३५ वा.
