हडपसर (पुणे) : पूर्व वैमनस्यातून दहशत निर्माण करण्यासाठी स्वत:ला भाई म्हणविणाऱ्या इसमाने हातात पिस्तुल घेऊन हवेत गोळीबार करण्याचा प्रकार हडपसर येथे घडला असून याप्रकणी एकाने वानवडी पोलीस ठाण्यात फिर्याद दिली आहे. त्यानुसार पोलसांनी तीन जणांविरोधात गुन्हा दाखल केला आहे.
अतिक इक्बाल शेख (वय ३७, रा. सय्यदनगर, हडपसर), सादीक शेख (वय २५), हुसेन मुस्तफा कादरी असे गुन्हा दाखल करण्यात आलेल्यांची नावे आहेत तर, इम्तियाज अफजल हुसेन शेख (वय ३७, रा. सय्यदनगर, हडपसर) यांनी फिर्याद दिली आहे.
पोलिसांनी दिलेल्या माहितीनुसार, आरोपी व फिर्यादी हे ओळखीचे आहेत. फिर्यादीचा भाऊ इम्रान व सादीक शेख याचा भाऊ शब्बीर कादरी यांच्यात मंगळवारी (ता. २७) भांडणे झाली. त्याचा राग मनात धरुन अतिक व इतर दुचाकीवरुन सय्यदनगर येथील गल्ली नं. २२ मधील कार्यालयात आले. कार्यालयात कोणी नसताना त्यांनी फिर्यादीला लाथांनी मारहाण करत मुख्य रस्त्यावर आणले.
दरम्यान, आरोपी अतिक याने हातात पिस्तुल घेऊन ‘यहा के भाई लोग हम है, हमारे नाद को लगे तो जान से हात धो बैठोगे,’असे बोलून पिस्तुलातून गोळीबार करत दहशत निर्माण केली.
याप्रकणी इम्तियाज यांनी वानवडी पोलीस ठाण्यात फिर्याद दिली. त्यानुसार आरोपींविरोधात यांच्यावर खूनाचा प्रयत्न व आर्म अॅक्टखाली गुन्हा दाखल करण्यात आला आहे. या घटनेचा पुढील तपास पोलीस करीत आहेत.
