तळेगाव दाभाडे: पुण्यातील तळेगाव दाभाडे येथे रात्री साडेआठच्या सुमारास अज्ञात व्यक्तींनी परिसरातील वेगवेगळ्या चार ठिकाणी हवेत गोळीबार केल्याची घटना घडली आहे. या गोळीबाराची माहिती मिळताच तळेगाव पोलीस घटनास्थळी दाखल झाले आहेत. हवेत गोळीबार करण्याचे कारण अद्यापपर्यंत समजू शकले नाही. हा गोळीबार परिसरात दहशत पसरविण्यासाठी केल्याचा प्राथमिक अंदाज आहे.
दोन दुचाकीवरून आलेल्या अज्ञात व्यक्तींनी परिसरातील वेगवेगळ्या चार ठिकाणी हवेत गोळीबार केला. यानंतर तळेगाव दाभाडे येथे एकच खळबळ उडाली आहे. हनुमान मंदिर आणि गजानन महाराज चौक या दोन ठिकाणांसह आणखी दोन ठिकाणी हवेत गोळीबार करण्यात आला आहे. गोळीबार केल्यानंतर अज्ञात व्यक्ती पसार झाले आहेत. याप्रकरणी तळेगाव पोलीस अधिक तपास करत आहेत.
