पिंपरी (पुणे): नोकराला शिवीगाळ करीत मारहाण करण्यात आली. याबाबत जाब विचारल्याने मालकालाही बेदम मारहाण करण्यात आली. ही घटना रविवारी (दि. १२) दुपारी दीड वाजताच्या सुमारास खेड तालुक्यातील कडवस्ती, खराबवाडी येथे घडली. लालासाहेब नवनाथ कड (वय ४०, रा. सारा सीटी, खराबवाडी) असे मारहाणीत जखमी झालेल्या व्यक्तीचे नाव असून त्यांनी याबाबत म्हाळुंगे पोलीस ठाण्यात फिर्याद दिली आहे. रोहिदास बबन कड (वय ४५), धिरज रोहीदास कड (वय २१), तन्मय रोहिदास कड (वय १९, सर्व रा. खराबवाडी) अशी गुन्हा दाखल झालेल्या आरोपींची नावे आहेत.
रविवारी दुपारी दीड वाजताच्या सुमारास फिर्यादी यांच्याकडे कामास असलेला रोहित कुरमे हा फिर्यादींच्या बिल्डिंगच्या बाजूची स्वच्छता करत होता. त्यावेळी आरोपींनी संगनमत करून त्यास शिवीगाळ व मारहाण केली. फिर्यादी यांनी त्यांना मारहाणीचा जाब विचारण्यासाठी गेले असता, रोहिदास बबन कड याने शिवीगाळ केली. त्यांचा मुलगा तन्मय कड याने लाकडी दांडक्याने तर धीरज कड याने एका हातात लोखंडी तलवार घेऊन दगडानेही मारहाण केली. यामध्ये फिर्यादी गंभीर जखमी झाले. तसेच सर्वांनी शिवीगाळ करून जिवे मारण्याची धमकी दिली. म्हाळुंगे पोलीस तपास करीत आहेत.
