पुणे : एका महिलेच्या घरात जबरदस्तीने घुसून तिच्यावर बलात्कार केला. त्यानंतर पाच जणांनी त्या महिलेला अश्लिल शिवीगाळ करत मारहाण केल्याचा धक्कादायक प्रकार पुण्यातील कात्रज परिसरात घडला आहे. ही घटना सोमवारी 3 जून रोजी दुपारी बाराच्या सुमारास घडली आहे. या प्रकरणी भारती विद्यापीठ पोलिसांकडून आरोपी सह पाच जणांवर बलात्कार आणि मारहाणीचा गुन्हा दाखल करण्यात आला आहे.
याबाबत पिडीत महिलेने मंगळवारी 4 जून रोजी भारती विद्यापीठ पोलीस ठाण्यात फिर्याद दिली आहे. त्यानुसार अभि नितीन खेडेकर, त्याचा मित्र, आई, बहिण आणि मामा यांच्यावर भादंवि कलम 376, 341, 452, 323, 509, 34 नुसार गुन्हा दाखल केला आहे.
पोलिसांनी दिलेल्या माहितीनुसार, आरोपी अभि खेडेकर याचे वडील नितीन खेडेकर हे फिर्यादी महिलेच्या ओळखीचे आहेत. सोमवारी ३ जून रोजी दुपारी बाराच्या सुमारास आरोपी अभि आणि त्याचे मित्र फिर्यादी महिलेच्या घरासमोर आले. अभि खेडेकर हा तिच्या घरात जबरदस्तीने घुसला आणि महिलेला अश्लील शिवीगाळ करुन जबरदस्तीने शारीरिक संबंध ठेवले. त्यानंतर आरोपी अभि खेडेकर, त्याची आई, बहिण आणि मामा यांनी महिलेच्या घरासमोर येत शिवीगाळ केली. तसेच फिर्यादी यांना हाताने बेदम मारहाण केली. या मारहाणीत महिलेच्या डोळ्याला, डोक्यात आणि बरगडीस गंभीर मार लागल्याने ती जखमी झाली आहे. पुढील तपास भारती विद्यापीठ पोलीस हे करीत आहेत.
