पुणे : पुण्यातील विमान नगर परिसरातील प्रसिद्ध अशा फिनिक्स मार्केट सिटी मॉलला आज शुक्रवारी दुपारी भीषण आग लागल्याची घटना घडली आहे. ही घटना दुपारी तीन वाजण्याच्या सुमारास घडली. अग्निशमन दलाच्या ६ गाड्या, २ टँकर आणि १ हायड्रोलिक प्लॅटफॉर्म घटनास्थळी दाखल झाल्या असून दुपारी साडे चार पर्यंत ही आग विझवण्यात अग्निशमन विभागाला यश आल्याची माहिती पुणे महापालिकेकडून देण्यात आली आहे.
अग्निशमन दलाच्या मदतीने सध्या आग आटोक्यात आणण्यात आली असून या आगीत कसलीही जीवितहानी झाली नाही. मात्र, काही नागरिकांना किरकोळ भाजल्याची प्राथमिक माहिती मिळत आहे. मॉलमध्ये बंद असलेल्या एका जुन्या रेस्टॉरंटमध्ये शॉर्ट सर्किटमुळे ही आग लागली असल्याची प्राथमिक माहिती आहे. मात्र, आग नेमकी कशामुळे लागली? याची खात्रीशीर माहिती मिळाली नाही.
