पुणे : शिरुर येथील मुलींच्या शासकीय कनिष्ठ व वरिष्ठ बालगृहातील दोन अल्पवयीन मुलींवर लैंगिक अत्याचार केल्याप्रकरणी तेथील कनिष्ठ लिपिक व त्याच्या मुलाला पुणे सत्र न्यायालयाचे न्यायाधीश ए. एस. वाघमारे यांनी १० वर्षे सक्तमजुरी व १० हजार रुपये दंड अशी शिक्षा सुनावली आहे. यातील कनिष्ठ लिपिकाचा सुनावणी दरम्यान मृत्यु झाला आहे.
या संदर्भात जिल्हा महिला व बालविकास आधिकारी मीनाक्षी रेवणसिद्ध बिराजदार यांनी फिर्याद दाखल केली होती. या खटल्यातील कनिष्ठ लिपिक शब्बीर अब्दुल बाले (वय. ५२) व त्याचा मुलगा बबलु उर्फ अमीर शब्बीर बाले (वय. ३१, दोघेही रा. शिरूर ता. शिरुर) या दोघांविरोधात शिरुर पोलीस ठाण्यात बलात्कार व बाल लैंगिक अत्याचार प्रतिबंधक अधिनियमा नुसार गुन्हा दाखल करण्यात आला होता.
शिरुरमधील शासकीय कनिष्ठ व वरिष्ठ बालगृहातील दोन अल्पवयीन मुलींवर या संस्थेच्या आवारातील कर्मचारी निवासस्थानात बोलावून शब्बीर बाले व त्याचा मुलगा बबलू बाले या दोघांनी नोव्हेंबर २०१३ ते एप्रिल २०१४ पर्यंत वेळोवेळी त्यांच्यावर बलात्कार केला होता. हा प्रकार कोणालाही सांगितला, तर मी तुमच्या स्वप्नात येऊन तुम्हाला मारेन अशी धमकी दिली होती. नंतर या पीडित मुलींना बालकल्याण समितीच्या आदेशानुसार केडगाव (ता. दौंड) येथील पंडिता रमाबाई मुक्ती मिशन येथे दाखल करण्यात आले. तेथील अधिक्षिका यांना पिडीत मुलींनी हा प्रकार सांगितला. त्यानंतर गुन्हा दाखल करण्यात आला होता.
न्यायालयात गुन्हा सिद्ध झाल्याने बलात्कार प्रकरणी दोषी धरुन आरोपींना १० वर्षे सक्तमजुरीची शिक्षा व १० हजार रुपये दंड, दंड न भरल्यास १ महिना शिक्षा व बाल लैंगिक अत्याचार प्रतिबंधक अधिनियम नुसार १० वर्षे शिक्षा व १० हजार रुपये दंड व दंड न भरल्यास १ महिना शिक्षा अशी शिक्षा न्यायालयाने सुनावली आहे. दोन्ही शिक्षा एकत्रितच भोगायच्या आहेत. यातील कनिष्ठ लिपिक शब्बीर अब्दुल बाले याचा सुनावणी दरम्यान मृत्यू झाला आहे.
या गुन्ह्याचा तपास तत्कालीन पोलीस निरीक्षक भगवान निंबाळकर व सुवर्णा हुलवान यांनी केला होता. या खटल्यात सरकारी वकील म्हणून मारुती वाडेकर यांनी काम पाहिले. त्यांना शिरूर पोलीस ठाण्यातील वरिष्ठ पोलीस निरीक्षक संदेश केंजळे, कोर्ट पैरवी कर्मचारी हवालदार बाळासाहेब गदादे, रेणुका भिसे, सत्र न्यायालय पैरवी अंमलदार उपनिरीक्षक विद्याधर निचीत, जिल्हा न्यायालय पैरवी अधिकारी पोलीस निरीक्षक संतोष घोळवे पोलीस, समन्स व वाॅरन्ट अंमलदार हवालदार वाडेकर यांनी सहकार्य केले.
