लोणी काळभोर, ता. 6 : शेतामधुन जावु नका, पिकांचे नुकसान होत आहे असे समजावुन सांगत असल्याचा राग मनात धरून 6 जणांच्या टोळक्याने एका शेतकऱ्याला शिवीगाळ, दमदाटी करून लाकडी दांडक्याने मारहाण केल्याची घटना घडली आहे. ही घटना तरडे (ता. हवेली) ग्रामपंचायत हद्दीतील गट क्रमांक 248 मध्ये 31 जुलै 2025 रोजी सकाळी साडेआठ वाजण्याच्या सुमारास घडली आहे. या मारहाणीत एकजण जखमी झाला आहे. तर 6 जणांवर लोणी काळभोर पोलीस ठाण्यात गुन्हा दाखल करण्यात आला आहे.
या मारहाणीत अंकुश रामभाऊ बरकडे (रा. तरडे) असे जखमी झालेल्याचे नाव आहे. तर शिवाजी राघु गडदे (वय 50), लक्ष्मण राघु गडदे (वय-55) रामभाऊ राघु गडदे (वय 45) बबन लक्ष्मण गडदे (वय 26 ) श्रीकांत लक्ष्मण गडदे (वय 19 ) दत्ता रामा गडदे (वय – 21, सर्व रा.तरडे ता. हवेली जि. पुणे.) अशी गुन्हा दाखल करण्यात आलेल्या आरोपींची नावे आहेत. मनिषा अंकुश बरकडे (वय-30, रा. तरडे, ता. हवेली जि. पुणे) यांनी लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, मनिषा व त्यांचे पती अंकुश बरकडे हे कुटुंबासोबत तरडे परिसरात राहतात. अंकुश बरकडे यांच्या नावावर तरडे गावातील गट नंबर 248 मध्ये 100 आर ऐवढे क्षेत्र आहे. त्यांच्या शेतीलगत गट नंबर 249 असुन सदर गटामध्ये आरोपींचे क्षेत्र आहे. त्यांच्या शेतजमिनीमध्ये जाण्या-येण्याकरीता रस्ता नसल्याने ते फिर्यादी यांच्या शेतजमिनीमधुन जाणे-येणे करीत आहेत.
आरोपी शेतीमधून वारंवार जात असल्याने पिकांचे मोठे नुकसान होत होते. त्यामुळे फिर्यादी व त्यांच्या पतींनी शेतातून जावू नका. असे यापूर्वीही समजावुन सांगितले होते. त्यावेळी आरोपींनी शिवीगाळ, दमदाटी व हाताने मारहाण केली होती. याप्रकरणी आरोपींच्या विरोधात लोणी काळभोर पोलीस ठाण्यात अदखलपात्र गुन्हा दाखल आहे.
दरम्यान, फिर्यादी मनिषा यांचे पती अंकुश बरकडे हे शेतात बकरी चरण्यासाठी गेले होते. तेव्हा अंकुश बरकडे यांनी आरोपींना शेतातून जावू नका असे सांगितले. शेतातून जाण्यास अडविल्याचा राग मनात धरून आरोपींनी शिवीगाळ, दमदाटी, लाकडी दांडक्याने व लाथा बुक्यांनी अंकुश बरकडे यांना बेदम मारहाण केली. या मारहाणीत अंकुश बरकडे हे जखमी झाले आहेत.
याप्रकरणी मनिषा बरकडे यांनी लोणी काळभोर पोलीस ठाण्यात फिर्याद दिली आहे. त्यानुसार आरोपींच्या विरोधात भारतीय न्याय संहिता कलम 190, 191(2), 191(3), 329(3), 115(2), 351 (2) (3) 352 प्रमाणे गुन्हा दाखल करण्यात आला आहे.
पुढील तपास लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पोलीस उपनिरीक्षक दिगंबर सोनटक्के करीत आहेत.
