पुणे : दुचाकीवरुन जाणाऱ्या तरुणांबरोबर वाद झाल्याच्या रागातून कर्जत-जामखेड मतदारसंघाचे आमदार रोहित पवार यांच्या माजी अंगरक्षकाने पिस्तूल काढून तरुणांवर रोखले. त्यानंतर तरुणांना शिवीगाळ करून दहशत माजविल्याची धक्कादायक घटना हडपसर भागात घडली. याप्रकरणी आरोपीकडून परदेशी बनावटीचे पिस्तूल आणि सात काडतुसे जप्त करण्यात आली आहेत.
याबाबत सौरभ तानाजी काळे (वय २७, रा. हडपसर) याने हडपसर पोलीस ठाण्यात फिर्याद दिली आहे. या फिर्यादीवरून प्रताप धर्मा टक्के (वय ३९, रा.कात्रज) याच्याविरुद्ध बुधवारी रात्री उशीरा हडपसर पोलीस ठाण्यात गुन्हा दाखल करण्यात आला.
पोलिसांनी दिलेल्या माहितीनुसार, आरोपी प्रताप टक्के बुधवारी (ता. ७) सायंकाळी सात वाजण्याच्या सुमारास हडपसर भागातील माळवाडी येथून निघाला होता. त्यावेळी दुचाकीवरुन जाणाऱ्या तरुणांबरोबर त्याचा वाद झाला. या रागातून प्रतापने त्याच्याकडील परवाना असलेले पिस्तूल तरुणांवर रोखले. तसेच तरुणांना शिवीगाळ करून परिसरात त्याने दहशत माजवून राडा घातला. त्यानंतर घाबरलेल्या सौरभ आणि मित्रांनी हडपसर पोलीस ठाण्यात धाव घेऊन तक्रार दिली.
प्रताप याच्याविरुद्ध रात्री उशिरा हडपसर पोलीस ठाण्यात जीवे मारण्याची धमकी देणे, तसेच शस्त्राचा धाक दाखविल्याप्रकरणी गुन्हा दाखल करण्यात आला, अशी माहिती हडपसर पोलीस ठाण्याचे वरिष्ठ पोलीस निरीक्षक रवींद्र शेळके यांनी दिली.
दरम्यान, आरोपी प्रताप गेल्या वर्षी आमदार रोहित पवार यांच्याकडे खासगी अंगरक्षक म्हणून काम करत होता. सध्या तो त्यांच्याकडे अंगरक्षक म्हणून काम करत नसल्याची माहिती पोलिसांनी दिली.
