उरुळी कांचन, (पुणे) : अष्टापूर (ता. हवेली) येथील ग्रामपंचायतीचे माजी उपसरपंच सोमनाथ माणिक कोतवाल यांची भाजप हवेली तालुका सोशल मीडिया अध्यक्षपदी निवड करण्यात आली आहे. राज्याचे उच्च व तंत्र शिक्षणमंत्री चंद्रकांत पाटील यांच्या हस्ते कोतवाल यांना निवडीचे पत्र देण्यात आले आहे.
यावेळी भाजपचे जिल्हाध्यक्ष शरद बुट्टे पाटील, जिल्हा बँकेचे संचालक प्रदीप कंद, महाराष्ट्र प्रदेश क्रीडा आघाडीचे पै. संदीप भोंडवे, पुणे कृषी उत्पन्न बाजार समितीचे संचालक रोहिदास उंद्रे, पश्चिम महाराष्ट्र भाजप व्यापार आघाडीचे अध्यक्ष विकास जगताप, भाजप युवा मोर्चाचे जिल्हाध्यक्ष संदीप सातव, महिला मोर्चा जिल्हाध्यक्ष पूनम चौधरी, हवेली तालुकाध्यक्ष शामराव गावडे, गणेश सातव, विजय जाचक, सिद्धेश हरपळे, आदी उपस्थित होते.
निवडीनंतर बोलताना सोमनाथ कोतवाल म्हणाले, “जिल्हा बँकेचे संचालक प्रदीप कंद, भाजपचे सोशल मीडियाचे जिल्हाध्यक्ष जनार्दन दांडगे, भाजप हवेली तालुकाध्यक्ष श्याम गावडे यांच्या मार्गदर्शनाखाली पक्षबांधणीचे काम जोरात सुरु केले आहे. नवनिर्वाचित सर्व पदाधिकाऱ्यांना सोबत घेऊन तसेच वरिष्ठांच्या आदेशानुसार पक्ष वाढीसाठी सर्वोतोपरी प्रयत्न करणार आहे.”
