Election : पुणे महापालिका निवडणुकीच्या पार्श्वभूमीवर मोठी राजकीय घडामोड घडली आहे. राष्ट्रवादी काँग्रेस शरदचंद्र पवार गट आणि उपमुख्यमंत्री अजित पवार यांच्या गटाच्या युतीच्या चर्चांनी जोर धरलेला असतानाच, शरद पवार गटाला पुण्यात मोठा धक्का बसला आहे. पक्षाचे शहराध्यक्ष प्रशांत जगताप यांनी आपल्या पदाचा आणि पक्षाच्या प्राथमिक सदस्यत्वाचा राजीनामा दिला आहे. (Election)
पुण्यात दोन्ही राष्ट्रवादी एकत्र येण्यास प्रशांत जगताप यांचा ठाम विरोध होता. गेल्या काही दिवसांपासून सुरू असलेल्या चर्चांमुळे ते अस्वस्थ असल्याचं त्यांनी स्पष्ट केलं. अखेर हा निर्णय घेत त्यांनी राजीनामा दिला असला, तरी राजकारणातून बाहेर पडणार नसल्याचं त्यांनी ठामपणे सांगितलं आहे. उलट, आपण पुणे महापालिकेची निवडणूक नक्की लढवणार असल्याचं त्यांनी जाहीर केलं आहे. त्यामुळे आता जगताप अपक्ष निवडणूक लढवणार की नव्या पक्षात प्रवेश करणार, याबाबत उत्सुकता वाढली आहे. (Election)
राजीनाम्यानंतर बोलताना प्रशांत जगताप म्हणाले, “गेल्या दहा-पंधरा दिवसांपासून वेगवेगळ्या चर्चा सुरू होत्या. पक्ष निवडणूक कशी लढवायची, यावर आम्ही सगळे काम करत होतो. जाहीरनामाही तयार झाला होता. पण त्याचवेळी अनेक राजकीय अफवा पसरवल्या गेल्या. त्यामुळे माझ्यासारखा कार्यकर्ता अस्वस्थ झाला होता.”
ते पुढे म्हणाले, “आपली भूमिका काय असावी, पुढचा प्रवास कसा असावा, याबाबत मनात प्रचंड घालमेल सुरू होती. ही घालमेल जास्त काळ ठेवणं योग्य नाही, असं मला वाटलं. ही अस्वस्थता आयुष्यावर परिणाम करु शकते, आरोग्यावरही परिणाम होऊ शकतो. म्हणून सर्वांचा सन्मान राखत मी राष्ट्रवादी काँग्रेस शरदचंद्र पवार पक्षाच्या शहराध्यक्ष पदाचा आणि प्राथमिक सदस्यत्वाचा राजीनामा देण्याचा निर्णय घेतला.”
मात्र, त्यांनी हेही स्पष्ट केलं की, “मी राजकारण सोडत नाही, समाजकारण सोडत नाही. माझा राजकीय प्रवास थांबलेला नाही. मी महापालिकेची निवडणूक लढवणार आहे आणि पुणे व राज्याच्या हितासाठी माझी लढाई पुढेही सुरूच राहील.”
दरम्यान, आपण आपला राजीनामा प्रदेशाध्यक्ष शशिकांत शिंदे यांना ई-मेलद्वारे पाठवला असल्याचंही प्रशांत जगताप यांनी सांगितलं आहे. या निर्णयामुळे पुण्यातील राष्ट्रवादीच्या राजकारणात मोठी खळबळ उडाली आहे.
