विशाल शिंदे
राजगड : राजगड तालुक्यातील विंझर गावचा शिलेदार संग्राम संतोष दसवडकर याने विभागीय स्तरावर भरलेल्या शालेय कुस्ती स्पर्धेत आपला झंझावाती खेळ दाखवत प्रथम क्रमांक मिळविला आहे. त्याच्या या उल्लेखनीय कामगिरीमुळे आता त्याची राज्यस्तरीय कुस्ती स्पर्धेसाठी निवड झाली आहे.
ही विभागीय कुस्ती स्पर्धा क्रीडा व युवक सेवा संचालनालय, महाराष्ट्र राज्य आणि जिल्हा क्रीडा अधिकारी कार्यालय, पुणे यांच्या संयुक्त विद्यमाने अहमदनगर जिल्ह्यातील श्रीगोंदा तालुक्यातील काष्टी येथे पार पडली. या स्पर्धेत 19 वर्षाखालील गटात 71 किलो वजनी गटात संग्रामने पराक्रम गाजवित पहिला क्रमांक पटकावला.
संग्राम दसवडकर हा विंझर येथील राजतोरण कुस्ती संकुलात नियमित सराव करीत असून तो महाराष्ट्र नवनिर्माण सेनेचे जिल्हाध्यक्ष आणि माजी पंचायत समिती सदस्य संतोष दसवडकर यांचा चिरंजीव आहे. त्याला वस्ताद राजाभाऊ लिम्हण, अंकुश दसवडकर, अनिकेत व्यवहारे, काळुराम जगताप, चंद्रकांत चव्हाण, विक्रम जगताप आदींनी प्रशिक्षण व मार्गदर्शन केले.
त्याच्या या यशाबद्दल माजी पंचायत समिती सदस्य संतोष दसवडकर, प्राचार्य भगवान बेल्हेकर, प्राचार्या तृप्ती शिळीमकर, क्रीडा शिक्षक दीपक कुवर यांनी त्याचे मन:पूर्वक अभिनंदन केले. गावात आणि परिसरात संग्रामच्या या यशाबद्दल आनंदाचे वातावरण असून राज्यस्तरीय स्पर्धेतही तो सुवर्णपदक मिळवेल अशी अपेक्षा व्यक्त केली जात आहे.
