पुणे: जिल्ह्यातील दूध भेसळीवर प्रतिबंधात्मक कारवाई करण्यासाठी अपर जिल्हाधिकारी यांच्या अध्यक्षतेखाली जिल्हास्तरीय समिती स्थापन करण्यात आली. या समितीमध्ये पुणे अपर पोलीस अधिक्षक, पुणे अन्न व औषध प्रशासन विभागाचे सहायक आयुक्त (अन्न), पुणे जिल्हा पशुसंवर्धन उपायुक्त, पुणे उप नियत्रंक वैध मापन शास्त्र हे सदस्य तर जिल्हा दुग्धव्यवसाय विकास अधिकारी हे सदस्य सचिव असणार आहेत. दूधात भेसळ करणाऱ्या व्यक्ती, डेअरी याची माहिती समितीकडे देण्यात यावी असे आवाहन समितीच्या वतीने करण्यात आले आहे.
दूध आपल्या दैनंदिन आहाराचा एक आवश्यक भाग असल्याने महत्वपूर्ण पोषक तत्वांचा स्रोत असून चांगले आरोग्य राखण्यास महत्वपूर्ण भूमिका बजावते. तथापि हानीकारक पदार्थांसह दुधात भेसळ केल्याने ग्राहकांच्या हिताला मोठा धोका निर्माण होतो. दूध भेसळीच्या सामान्य प्रकारामध्ये पाणी, क्रीम मिल्क पावडर, वनस्पती तेल, स्टार्च, युरिया, डिटर्जंटस आणि इतर रसायनांचा समावेश करतात, हे भेसळ करणारे केवळ दुधाच्या पौष्टिक मुल्याशी तडजोड करीत नाहीत. तर मानवी शारिरीक समस्या, पचन, अॅलेंजी आणि दीर्घकालीन अवयवांचे नुकसान या सारख्या गंभीर आरोग्य समस्या देखील होऊ शकतात. या समस्याचा प्रभावीपणे सामना करण्यासाठी ग्राहक, सरकारी संस्था, दुग्ध उद्योगाचे भागधारक आणि नियामक संस्था यांनी एकत्रपणे काम करणे अत्यंत आवश्यक आहे, असे अन्न व औषध प्रशासन विभागाच्या वरिष्ठ अधिकाऱ्यांनी म्हटले आहे.
कसूरदारांवर कठोर फौजदारी कारवाई करणार
पुणे जिल्ह्यातील दूध संकलन स्वीकृती केंद्र हे जिल्ह्यातील, जिल्ह्याबाहेरील तसेच परराज्यांतून येणाऱ्या दुधाचे नमुने तसेच सहकारी व खाजगी क्षेत्रातील दूध संकलन व प्रक्रिया केंद्रावरील (डेअरी) नमुने यांची तपासणीसाठी सहायक आयुक्त (अन्न ) यांना दरमहा उद्दिष्ठ ठरवून देण्यात आले आहे. दूध व दुग्धजन्य पदार्थ भेसळीत सहभागी असणाऱ्या व्यक्ती, डेअरी विरोधात प्रथम खबरी अहवाल नोंदवून भेसळ केल्याचे आढळून आलेल्या कसूरदारांवर कठोर फौजदारी कारवाई करण्यात येईल, असे अन्न व औषध प्रशासन विभागाच्या वरिष्ठ अधिकाऱ्यांनी सांगितले.
