हडपसर: हांडेवाडी रस्त्यावरील टेकडीच्या उतारावर एका अनोळखी व्यक्तीचा मृतदेह सापडल्याची घटना रविवारी (ता.१२) सायंकाळी सहा वाजण्याच्या सुमारास उघडकीस आली आहे. अनोळखी मृताची ओळख पटवून त्याच्या कुटुंबीयांचा शोध घेण्याचे हडपसर पोलिसांसमोर आव्हान आहे. त्यामुळे या मृतदेहाची ओळख पटविण्यासाठी हडपसर पोलिसांनी मयताच्या हातावरील टॅटू प्रसिद्ध केला आहे.
पोलिसांनी दिलेल्या माहितीनुसार, अंदाजे ३० ते ३५ वय असलेल्या इसमाचा मृतदेह रविवारी (ता.१२) सायंकाळी सहा वाजण्याच्या सुमारास अँपोझीट रिदम कंट्री सिटीजवळ सापडला आहे. मयताच्या डाव्या हाताच्या पाठीमागे पोटरीवर राजू नाव लिहिलेला टॅटू तर उजव्या हातात कडे आढळून आले आहे. तसेच मयताच्या अंगावर एसडी आर्मी कंपनीचा शर्ट आढळून आला आहे.
मयताच्या हातावरील टॅटू पोलिसांनी ओळख पटविण्यासाठी प्रसिद्ध केला असून याबाबत कोणाला काही माहिती मिळाल्यास 9923139779 या दूरध्वनी क्रमांकावर संपर्क करावा, असे आवाहन हडपसर पोलीस ठाण्याचे वरिष्ठ पोलीस निरीक्षक संतोष पांढरे यांनी केले आहे. तसेच माहिती देणाऱ्याचे नाव गुप्त ठेवण्यात येईल, असेही त्यांनी सांगितले आहे.
