Daund Sugar Factory : संदीप टूले ( दौंड ) : दौंड तालुक्यातील आलेगाव ( दौंड) येथील दौंड शुगर साखर कारखान्यात आज रविवारी सकाळी मोठी दुर्घटना घडली आहे. या दुर्घटनेमध्ये दोन तरुण कामगारांचा दुर्दैवी मृत्यू झाला आहे. या दुर्घटनेबाबत दौंड पोलिसांनी आकस्मिक मृत्यूची म्हणून नोंद केली आहे.
दौंड शुगर कारखान्यात घडलेल्या या दुर्घटनेत संदीप कुंडलिक गरदडे (वय २३, रा.पेडगाव ता.दौंड ) आणि गणेश सिताराम शिंदे ( वय २३,रा.शेडगाव पिसारे, ता.करमाळा, जि.सोलापुर ) या दोन दुर्दैवी कामगारांचा मुत्यृ झाला आहे. या घटनेबाबत फारुक दुगे यांनी पोलिसांना खबर दिली. कारखान्यातील नवीन प्लँटच्या गरम पाणी असणाऱ्या टाकी लाईनमध्ये संदीप हा फोमवर पाणी मारण्याचे काम करीत होता.
येथे काम करत असताना संदीप येथील एका गरम पाण्याच्या टाकीमध्ये पाय घसरुन पडला. त्याला टाकीत पडलेला पाहून खलाशी म्हणुन काम करीत असलेला गणेश शिंदे हा त्यास वाचविण्यासाठी गेला. मात्र, त्यात त्याचा तोल जाऊन, तोही त्या टाकीत पडला. ही घटना समजताच तेथील इतर कामगारांनी इतरांच्या मदतीने त्या दोघांना टाकीतून बाहेर काढले मात्र तोपर्यंत खूप उशीर झाला होता. हे दोघेही गरम पाण्यात पडल्याने मयत झाल्याचे दिसुन आले. त्यांना तातडीने उपचारासाठी दौंड उपजिल्हा रुग्णालयात हलविण्यात आले मात्र डॉक्टरांनी त्यांना मयत घोषित केले. घटनेचा पुढील तपास पोलिस उपनिरीक्षक सतिश राऊत करीत आहेत.
