पुणे : वैद्यकीय पदवी अथवा पदविका नसताना प्रॅक्टीस करणाऱ्या मिलनकुमार अमर ठाकूर (वय ३४, रा. धानोरी, मूळ. पश्चिम बंगाल) या बोगस डॉक्टरला न्यायालयाने २ वर्षे सक्तमजुरी आणि २ हजार रुपये दंडाची शिक्षा सुनावली आहे. खडकी येथील प्रथमवर्ग न्यायदंडाधिकारी एल. व्ही. श्रीखंडे यांच्या न्यायालयाने हा निकाल दिला आहे. दंड न भरल्यास त्याला १५ दिवस अतिरिक्त कारावास भोगावा लागेल, असेही न्यायालयाने निकालात नमूद केले आहे.
याबाबत २० ऑगस्ट २०१४ रोजी महापालिका वैद्यकीय अधिकारी डॉ. रेखा उमेश गलांडे ऊर्फ डॉ. रेखा लबडे यांनी दिलेल्या फिर्यादिवरून विश्रांतवाडी पोलिसात गुन्हा दाखल झाला होता. मोहिमेंतगर्त फिर्यादी बोगस डॉक्टरचा शोध घेत होत्या. त्यावेळी ठाकूरकडे अॅलोपॅथीची कोणतीही वैद्यकीय पदवी नसताना औषधांचा साठा आढळून आला. बीईएमएस व्यावसायिकांना डॉक्टर उपाधी लावण्याचा अधिकार नसताना, त्याच्याकडे लेटर पॅड व डॉक्टर उपाधीचा शिक्का आढळून आला. त्याद्वारे तो व्यवसाय करत असल्याचे फिर्यादीत नमूद करण्यात आले होते.
याप्रकरणी पोलिसंनी तपास करून दोषारोपपत्र दाखल केले. सरकारी पक्षातर्फे सहाय्यक सरकारी अभियोक्ता सायली ठोकळ यांनी काम पाहिले. सहायक पोलिस निरीक्षक सूर्यकांत मारूडे यांनी तपास केला. त्यांना न्यायालयीन कामकाजासाठी सहायक पोलीसि फौजदार पाटील, हवालदार कोळप आणि शिपाई घोडेकर यांनी मदत केली.
