दौंड : छत्रपती संभाजी महाराज यांच्या जीवनावर आधारित ‘छावा’ हा चित्रपट नुकताच देशासह संपूर्ण महाराष्ट्रात प्रदर्शित झाला आहे. या चित्रपटला प्रेक्षकांचा उत्तम प्रतिसाद मिळत आहे. मात्र, या चित्रपटाच्या तिकिटांच्या दरांमुळे सामान्य मराठी प्रेक्षकांना तो पाहणे कठीण जात असल्याने ‘छावा’ चित्रपट महाराष्ट्रात करमुक्त करण्याची मागणी दौंडचे आमदार राहुल कुल यांनी राज्याचे मुख्यमंत्री देवेंद्र फडणवीस यांना पत्र देऊन केली आहे.
‘छावा’ चित्रपट संपूर्ण कुटुंबासह पाहण्यासाठी तिकिटांचे दर ५०० ते ६०० रुपये प्रत्येकी मोजावे लागत आहेत. अशा स्थितीत चार-पाच जणांचे कुटुंब एकत्र चित्रपट पाहण्यासाठी गेले तर खर्च २ हजार ते २ हजार ५०० शे रुपयांपर्यंत खर्च जातो. हा खर्च मराठी मध्यमवर्गीय कुटुंबांना परवडणारा नाही. छत्रपती संभाजी महाराजांचा इतिहास नव्या पिढीला समजला पाहिजे आणि केवळ मराठीच नव्हे, तर इतर भाषिक प्रेक्षकांनाही तो पाहता यावा अशी मराठी जनतेची इच्छा आहे.
मात्र वाढलेल्या तिकिटांच्या दरांमुळे हा चित्रपट सर्वसामान्यांसाठी सहज पाहता येईल की नाही, याबाबत शंका आहे. ही अडचण ओळखत आमदार राहुल कुल यांनी याच पार्श्वभूमीवर महाराष्ट्र सरकारने ‘छावा’ चित्रपट महाराष्ट्रात करमुक्त करण्याचा निर्णय घ्यावा. यासाठी राज्याचे मुख्यमंत्री देवेंद्र फडणवीस हे बुधवार (दि. १९) रोजी पुणे दौऱ्यावर आले असता आमदार कुल यांनी मुख्यमंत्र्यांची भेट घेऊन ‘छावा’ हा हिंदी चित्रपट महाराष्ट्रात करमुक्त करण्याची मागणी केली.
छावा हा चित्रपट छत्रपती संभाजी महाराजांच्या प्रेरणादायी जीवनाचे चित्रण करणारा चित्रपट आहे. तो महाराष्ट्रात करमुक्त केल्याने, विद्यार्थी आणि सामान्य नागरिकांसह मोठ्यासंख्येने प्रेक्षकांना कोणत्याही आर्थिक बोजाशिवाय आपला समृद्ध मराठा इतिहास पाहण्याची आणि शिकण्याची संधी मिळेल. त्यामुळे या विनंतीचा सकारात्मक विचार करून राज्यभर छावा करमुक्त करण्यासाठी आवश्यक पावले उचलावीत अशी मागणी केली. याबाबत मुख्यमंत्री देवेंद्रजी फडणवीस यांनी सकारात्मक कार्यवाहीचे आश्वासन दिले.
ॲड. राहुल कुल आमदार दौंड
