बिबवेवाडी : बीआरटी मार्गातून प्रवास करण्यास बंदी असतानाही नियमांचे उल्लंघन सर्रास होताना दिसते. यातून अपघाताच्या घटना घडत आहेत. सातारा रस्ता बीआरटी मार्गात पद्मावती पूलावर बस व दुचाकीची समोरासमोर धडक होऊन झालेल्या अपघातात दुचाकीवरील तरुण गंभीर जखमी झाला.
अपघातात जखमी झालेल्या तरुणाचे नाव लखन पाव्हणे (वय १८, रा. सुखसागर नगर, कात्रज) असे आहे. लखन हा दुचाकीवरून सातारा रस्ता बीआरटी मार्गातून स्वारगेटच्या दिशेने कॉलेजला जात होता. या वेळी पद्मावती पुलावरील वळणाच्या रस्त्यावर समोरून येणाऱ्या बसला धडक बसून झालेल्या अपघातात लखन गंभीर झाला.
दरम्यान, जखमी तरुणाला नागरिकांनी तातडीने उपचारासाठी खासगी रुग्णालयात दाखल केले. या प्रकरणी सहकारनगर पोलिसांनी बस चालक निलेश जाधव (वय ३६) याला ताब्यात घेतले आहे. या घटनेचा अधिक तपास पोलीस करत आहेत.
