पुणे : पुण्यातील ड्रग्ज व्हिडीओ व्हायरल प्रकरणानंतर प्रशासन जोरदार कामाला लागले आहे. पुण्यातील बार आणि पबवर पालिकेची जोरदार कारवाई सुरु झाली आहे. मुख्यमंत्री एकनाथ शिंदे यांनी ही कारवाई सुरु करण्याचे आदेश दिले आहे. पुण्यामध्ये ड्रग्ज प्रकरण गाजत आहे. सांस्कृतिक राजधानी पुण्यात वारंवार अंमलीपदार्थांचा उघड सेवन विक्री आणि सेवन वाढत चालल्याचे उघडकीस आले आहे. आता नुकताच पुण्यातील एफसी रोडवरील एका रेस्टॉरंटमध्ये अल्पवयीन मुलांना उघडपणे ड्रग्ज पुरविले जात असल्याचा व्हिडीओ कॉंग्रेसचे आमदार रवींद्र धंगेकर यांनी व्हायरल केला होता.
त्यानंतर कालच आणखी ड्रग्ज पार्टीचा व्हिडीओ व्हायरल झाल्यानंतर विद्येचे माहेरघर पुणे उडता पंजाब झाल्याची टीका विरोधकांकडून होत आहे. त्यानंतर मुख्यमंत्री एकनाथ शिंदे यांनी या प्रकरणात अनधिकृत बार आणि पबवर कारवाई करण्याचे आदेश कालच दिले होते. त्यानंतर पुणे महानगर पालिकेच्या तोडक पथकाने मंगळवारी फर्ग्युसन रोडवरील बारवर जोरदार तोडकाम कारवाई सुरु केली आहे. या कारवाईमुळे आता राज्य सरकारही उत्तर प्रदेशातील योगी आदित्य यांचा बुलडोझर कित्ता गिरविते की काय अशी चर्चा सुरु झाली आहे.
पुण्यात सर्वात आधी ललित पाटील ड्रग्स प्रकरण चर्चेत आले तेव्हा अंमलीपदार्थ्यांच्या खुलेआम व्यापार सुरु असून पोलिसच यात गुंतलेले असल्याचे उघडकीस आले होते. त्यानंतर या प्रकरणी राज्य सरकारने अनेक पोलिसांवर कारवाई केली होते. हे प्रकरण शांत होत न होत तोच आता पुण्याचे नामांकित बिल्डर अग्रवाल यांच्या अल्पवयीन मुलाने नंबरप्लेट नसलेल्या
आलीशान पोर्शे कारने बाईकवरुन निघालेल्या तरुण-तरुणींना उडविल्याने त्यांचा जागीच मृत्यू झाल्याचे उघडकीस आले होते. त्या अनुषंगाने अनधिकृत बार आणि पबवर कारवाई सत्र सुरू झाले होते. आता ते प्रकरण ताज असतानाच आता पुण्यातील एफसी रोडवरील एल-3 बारमध्ये एका अल्पवयीन तरुणाला खुलेआम ड्रग्स सर्व्ह केली जात असल्याचे उघडकीस आले होते. तसेच पहाटेपर्यंत पब आणि बार सुरु असल्याचे व्हिडीओत दिसत होते.
दिखाऊ कारवाई : रवींद्र धंगेकर
पुण्यातील अनधिकृत पब आणि बारवर बुडडोझर कारवाई सुरु झाली आहे. या प्रकरणात पहिला व्हिडीओ व्हायरल करुन वाचा फोडणारे कॉंग्रेसचे पुण्याचे आमदार रवींद्र धंगेकर यांनी या कारवाईला दिखाऊ कारवाई म्हटले आहे. अधिवेशन दोन दिवसांवर आले आहे. त्यामुळे विरोधकांच्या प्रश्नांना जाण्यापूर्वी मुख्यमंत्री एकनाथ शिंदे यांनी बारवार कारवाई सुरु केली आहे. ही कारवाई सर्वच बारवर करावी असे मागणी देखील धंगेकर यांनी केली आहे. एक बार तर आमदाराचा असल्याचा आरोप धंगेकर यांनी केला आहे.
