पुणे : पुणे आणि पिंपरी-चिंचवड शहरात गुन्हेगारीच्या घटनांमध्ये वाढ होताना दिसत आहे. खून, खुनाचा प्रयत्न, अत्याचार, चोरी, अपहरण, मारहाण आणि कोयता हल्ला यासारख्या घटना सतत घडत आहेत. अशातच आता पिंपरी-चिंचवड शहरातील निगडी परिसरातून एक धक्कादायक घटना समोर आली आहे. दोन अल्पवयीन मुलांनी बिल्डिंग कॉन्ट्रॅक्टरच्या मुलाची निर्घृण हत्या केल्याची घटना घडली आहे.
ही घटना मंगळवारी रात्रीच्या सुमारास निगडी परिसरातील मासाहेब मीनाताई ठाकरे मार्गाजवळ घडली आहे. मोहम्मद सैपन बागवान (१६ वर्षे) असं हत्या करण्यात आलेल्या मुलाचे नाव आहे. या घटनेने शहरात मोठी खळबळ उडाली आहे.
याबाबत मिळालेल्या माहितीनुसार, निगडी येथे बिल्डिंग कॉन्ट्रक्टरच्या अल्पवयीन मुलाची निर्घृण हत्या करण्यात आली आहे. मंगळवारी रात्री काही अल्पवयीन मुले जमली होती आणि यादरम्यान त्यांच्यात आपसी वाद सुरू झाला. यावेळी दोघांनी आपल्या सोबत आणलेल्या धारधार शस्त्राने वार करत हत्या केली. या घटनेनंतर आरोपींनी घटनास्थळावरून पळ काढला. याप्रकरणी निगडी पोलिसांनी आरोपींविरोधात गुन्हा दाखल करत अवघ्या काही तासांमध्ये त्यांना जेरबंद केलं आहे. या घटनेचा पुढील तपास निगडी पोलीस करत आहेत.
