पुणे: पुण्यातील दापोडी येथील उपविभागीय सहकारी संस्थेत लाच मागणीचा प्रकार घडल्याची संतापजनक माहिती समोर आली आहे. तक्रारदार यांनी नवीन सामाजिक संस्थेची नोंदणी करण्यासाठी प्रसार व स्वयंशासन विभागाच्या पत्रात दिलेल्या माहितीनुसार, दिनांक २४/०३/२०२४ रोजी उपविभागीय सहकारी संस्था कार्यालय, दापोडी, पुणे येथे त्यांनी लोकसेवक श्रीमती संगीता सुभद्रा बाबुराव किरवले-चौधरी, सहकारी अधिकारी श्री मुकुंद विमल भास्कर पवार यांना संस्थेच्या नोंदणीसाठी संबंधित कागदपत्रे सादर केली होती. संस्थेसाठी आवश्यक असलेली प्रवेश फी ५०० रुपये व वार्षिक सभासद फी ११,२०० रुपये अशी रक्कम भरून, तसेच एकूण १६ सभासदांची यादी सादर करण्यात आली होती.
या फाईलवर स्वाक्षरी घेण्यासाठी तक्रारदार कार्यालयात गेले असता, सहकारी अधिकारी संगीता सुभद्रा बाबुराव किरवले-चौधरी यांनी तक्रारदाराकडे लाचेची मागणी केली. यानंतर दिनांक २६/०६/२०२४ रोजी तक्रारदाराने लाचलुचपत प्रतिबंधक विभाग, पुणे यांच्याकडे तक्रार दाखल केली. तक्रारीच्या अनुषंगाने विभागाने प्राथमिक चौकशी केली असता, आरोपी सहकाऱ्याने तक्रारदाराकडून ३००० रुपये लाचेची मागणी केल्याचे स्पष्ट झाले. यासोबतच उप-उपनिबंधक श्री मुकुंद विमल भास्कर पवार यांनीही ३००० रुपये लाच मागितल्याचे निष्पन्न झाले.
या प्रकरणात आरोपी लोकसेवक संगीता सुभद्रा बाबुराव किरवले-चौधरी, मुकुंद विमल भास्कर पवार व एका अज्ञात लोकसेवकाने एकत्र येऊन तक्रारदाराकडून लाच मागितल्याचे स्पष्ट झाले. तक्रारदाराच्या फाईलवर स्वाक्षरी करण्यासाठी संबंधित अधिकारी व उप-उपनिबंधक यांनी प्रत्येकी ३००० रुपये लाचेची मागणी केल्याची माहिती मिळाली. लाच मागणी संदर्भात विभागाने सापळा रचून कारवाई केली असून, संबंधितांविरोधात लाचलुचपत प्रतिबंधक विभाग, पुणे यांच्याकडून गुन्हा नोंदविण्यात आला आहे. सदरची कारवाई पोलीस उपआयुक्त शिरीष सरदेशपांडे व अपर पोलीस अधीक्षक डॉ. शीतल जानवे यांच्या मार्गदर्शनाखाली पुणे लाचलुचपत प्रतिबंधक विभागाने केली आहे. या प्रकरणामुळे सहकारी संस्थांच्या पारदर्शकतेवर प्रश्नचिन्ह निर्माण झाला असून, कारवाईचे गांभीर्य लक्षात घेता नागरिकांनी अशा घटनांबाबत तत्काळ माहिती देण्याचे आवाहन करण्यात आले आहे.
