पुणे: राज्य निवडणूक आयोगाने पुणे महापालिकेची (Pune News) अंतिम प्रभाग रचना जाहीर केली असून, निवडणुकीच्या तयारीतील हा महत्वाचा टप्पा पूर्ण झाला आहे. प्रारूप आराखड्याच्या तुलनेत 11 प्रभागांमध्ये बदल करण्यात आले आहेत. त्यापैकी सर्वाधिक बदल प्रभाग क्रमांक 38 (आंबेगाव-कात्रज) आणि प्रभाग क्रमांक 15 (नऱ्हे-वडगाव बुद्रुक) येथे झाले आहेत. याशिवाय आठ प्रभागांच्या नावांमध्येही सुधारणा करण्यात आली आहे.
प्रारूप आराखड्यावर जवळपास 6 हजार हरकती दाखल झाल्या होत्या. अप्पर मुख्य सचिव व्ही. राधा यांच्या अध्यक्षतेखालील समितीने या हरकतींवर सुनावणी घेत आपला अहवाल राज्य सरकारला सादर केला. या अहवालानुसार आयोगाने आवश्यक बदल करून अंतिम आराखड्यावर शिक्कामोर्तब केले.
अंतिम रचनेत सर्वाधिक बदल दक्षिण पुण्यात झाले आहेत. प्रभाग क्रमांक 38 (आंबेगाव-कात्रज) हा पाच सदस्यीय प्रभाग आहे. या प्रभागामध्ये बालाजीनगर, आंबेगाव खुर्द आणि आंबेगाव दबाडी (शिवसृष्टी) हे भाग जोडण्यात आले आहेत. तसेच प्रारूप आराखड्यात नऱ्हे-वडगाव बुद्रुक प्रभागात असलेले कोळेवाडी आणि जांभूळवाडीचे क्षेत्र आता या प्रभाग क्रमांक 38 मध्ये समाविष्ट करण्यात आले आहे. त्यामुळे हा प्रभाग आकाराने लहान विधानसभा मतदारसंघाइतकाच मोठा बनला आहे.
बालाजीनगरचे तुकडे प्रारूप आराखड्यात वेगवेगळ्या प्रभागात गेले होते. मात्र, अंतिम रचनेत बालाजीनगर एकत्रितपणे प्रभाग 38 मध्ये सामील करण्यात आला आहे. त्यामुळे येथे अनेक दिग्गज आमनेसामने येण्याची शक्यता असून, निवडणूक अत्यंत चुरशीची ठरणार आहे. या बदलांमुळे शेजारील पाच प्रभागांतही फेरबदल करावे लागले.
खराडी-वाघोली प्रभागातील मतदारसंख्या वाढवण्यासाठी मांजरी बुद्रुक आणि साडेसतरा नळी येथील काही भाग जोडण्यात आले आहेत. रामटेकडी-माळवाडी, वानवडी-साळुंकेविहार, गुरुवार पेठ-घोरपडे पेठ आणि रविवार पेठ-नाना पेठ या ठिकाणी तुटलेले प्रगणक गट एकत्र करण्यात आले आहेत.
प्रभाग क्रमांक 1 (कळस-धानोरी-लोहगाव उर्वरित) येथे अनुसूचित जाती आणि अनुसूचित जमाती अशी दोन आरक्षणे पडली आहेत. त्यामुळे सर्वसाधारण गटातून लढणाऱ्या किमान एका उमेदवाराला फटका बसणार आहे. 2017 च्या निवडणुकीत अशीच परिस्थिती तत्कालीन प्रभाग क्रमांक 7 (विद्यापीठ-वाकडेवाडी) येथे निर्माण झाली होती.
प्रारूप आराखड्यात भारतीय जनता पक्षाचे वर्चस्व दिसून आले होते. अंतिम रचनेत फारसे मोठे बदल झाले नसल्याने भाजपचा वरचष्मा कायम राहिल्याचे स्पष्ट झाले आहे. विरोधकांच्या काही प्रभागात बदल झाले असले तरी भाजपमध्ये होणाऱ्या ‘इनकमिंग’चा विचार करता पक्षाची स्थिती अधिक मजबूत राहणार असल्याचे संकेत आहेत.
