पुणे : खेड, आंबेगाव, जुन्नर आणि मावळ तालुक्यातील आदिवासी विभागातील योजनांना गती मिळावी, यासह इतर अनेक प्रश्नांवर चर्चा करण्यासाठी भारतीय जनता पक्षाचे पुणे जिल्हा (उत्तर) अध्यक्ष शरद बुट्टे-पाटील यांनी राज्याचे आदिवासी विकासमंत्री विजयकुमार गावित यांची भेट घेतली. यादरम्यान विविध मुद्यांवर चर्चा करण्यात आली.
पुणे जिल्ह्यातील खेड, आंबेगाव, जुन्नर आणि मावळ तालुक्यातील आदिवासी विभागातील योजनांना गती मिळावी आणि ज्यांच्याकडे पुरावे नाहीत अशा अनुसूचित जमातीमधील महादेव कोळी, ठाकर आणि कातकरी समाजातील नागरिकांना घोडेगाव आदिवासी प्रकल्पाच्या शिफारशीवरून जातीचे दाखले मिळावे यासंबंधी बुट्टे-पाटील यांनी गावित यांच्याशी सविस्तर चर्चा केली. या चर्चेदरम्यानच मंत्रीमहोदयांनी घोडेगाव आदिवासी प्रकल्पाच्या प्रकल्प अधिकाऱ्यांना तातडीने फोन करून अशाप्रकारे प्रस्ताव आलेल्या सर्व प्रस्तावांची पाहणी करून शिफारस करण्याच्या सूचना केल्या.
तसेच पुढील महिनाभराच्या कालावधीत मोठ्या प्रमाणावर यानुसार जातीचे दाखले देण्याचे नियोजन केले आहे. शिवाय, पक्षाच्या माध्यमातून या क्षेत्राचा मंत्री महोदय दौरा देखील करणार असून, यातून रखडलेली विविध विकासकामे मार्गी लावण्याचा प्रयत्न असल्याचे सांगण्यात आले.
दरम्यान, या भेटीसाठी भाजपचे प्रदेशाध्यक्ष चंद्रशेखर बावनकुळे यांना विनंती करण्यात आली होती. त्यांच्या सूचनेनुसार ही भेट झाली. यासाठी प्रदेश सरचिटणीस मुरलीधर अण्णा मोहोळ यांनी सहकार्य केले.
लवकरच समन्वय बैठक आयोजित करणार..
महसूलमंत्री राधाकृष्ण विखे पाटील यांची देखील मी आणि आशा बुचके यांनी आज भेट घेतली. लवकरच उत्तर पुणे जिल्ह्यातील प्रमुख कार्यकर्ते आणि महसूल विभागाचे सर्व अधिकारी अशी एक समन्वय बैठक आपण आयोजित करणार आहोत. कार्यकर्त्यांची सर्व कामे स्थानिक पातळी झाली पाहिजे हा त्यामागचा उद्देश असल्याचे बुट्टे-पाटील यांनी सांगितले.
