पुणे : भाजपनं अजित पवारांना लोकल नेता बनवलं, शरद पवारांच्या नेतृत्वात काम करत होते, तेव्हा अजित पवार राज्यभर फिरायचे, त्यांनी बारामतीत अडकून राहावं ही भाजपची चाल असल्याची टीका रोहित पवार यांनी अजित पवार यांच्यावर केली आहे. राष्ट्रवादीच्या फुटीनंतर अजित पवार आणि रोहित पवार एकमेकांवर सतत टीका करताना दिसत आहेत. अशातच आता पुन्हा एकदा रोहित पवारांनी अजित पवारांवर जोरदार निशाणा साधला आहे.
काय म्हणाले रोहित पवार?
भारतीय जनता पक्षाने अजित पवारांना लोकल नेता बनवलं आहे, शरद पवारांच्या नेतृत्वात काम करायचे तेव्हा अजित पवार महाराष्ट्रभर फिरत होते, पण सध्या मात्र, अजित पवार बारामतीत अडकल्याचे दिसत आहेत. शरद पवारांच्या वयासंदर्भात कायम बोललं जातं आहे. आज आमचा 70 वर्षाचा युवा नेता राज्यभर 40 ते 50 सभा घेणार आहेत.
मात्र अजित पवार फक्त बारामतीत फिरताना दिसत आहेत. महाराष्ट्रभर अजित पवारांनी बोलू नये, अशी भाजपची इच्छा आहे. अजित पवारांसंदर्भात राज्यात नकारात्मक वातावरण भाजपमध्ये निर्माण झालं आहे. त्यातच बारामतीत अजित पवारांचा उमेदवार तीन लाखांनी मागे दिसत आहे, अशी टीका देखील रोहित पवार यांनी केली आहे.
