पुणे : पुणे पोलिसांनी पुणे, कुरकुंभ, दिल्ली येथे छापे टाकून मेफेड्रोन तस्करी उघडकीस आणली. याच मेफेड्रोन तस्करी प्रकरणात पुणे पोलिसांच्या पथकाने पश्चिम बंगालमधील मालदा येथून एकाला ताब्यात घेतले. अमली पदार्थ तस्कर संदीप धुनिया याच्या संपर्कात पश्चिम बंगालमधील संशयित आरोपी असल्याचे आढळून आले आहे. सुनील बर्मन असे ताब्यात घेण्यात आलेल्या संशयिताचे नाव आहे.
याप्रकरणी मिळालेल्या अधिक माहितीनुसार, बर्मन याला अद्याप या प्रकरणात अटक करण्यात आली नसून, त्याची चौकशी सुरू असल्याची माहिती गुन्हे शाखेतील अधिकाऱ्यांनी दिली. या प्रकरणात सात आरोपी फरार आहेत. त्यांचा शोध घेण्यात येत आहे. बर्मन फरार आरोपींपैकी एक असल्याचे सांगण्यात येत आहे.
पुणे पोलिसांनी ३ हजार ७०० कोटींचे मेफेड्रोन जप्त केले. या प्रकरणी सात जणांना अटक करण्यात आली असून, मुख्य सूत्रधार संदीप धुनिया असल्याचे तपासात उघडकीस आले आहे. धुनिया हा मुंबईतील एकाच्या संपर्कात होता. तो नेपाळमार्गे कुवेतला पसार झाला आहे. पश्चिम बंगालमधून ताब्यात घेण्यात आलेला बर्मन पुण्यात येऊन गेल्याचे उघडकीस आले आहे. तो अन्य आरोपींच्या संपर्कात असल्याची माहिती पोलिसांनी दिली.
